پنجاب سوشل سکیورٹی ہیڈ آفس میں سالانہ حج قرعہ اندازی کی تقریب

جمعرات 9 اکتوبر 2025 18:55

لاہور (اُردو پوائنٹ اخبارتازہ ترین - این این آئی۔ 09 اکتوبر2025ء) پنجاب سوشل سکیورٹی (پیسی) ہیڈ آفس میں سالانہ حج قرعہ اندازی کی تقریب منعقد ہوئی جس میں صوبائی وزیر محنت و افرادی قوت فیصل ایوب کھوکھر نے بطورِ مہمانِ خصوصی شرکت کی۔ تقریب میں کمشنر پنجاب سوشل سکیورٹی محمد علی اور دیگر افسران بھی شریک ہوئے۔ صوبائی وزیر نے تقریب کے دوران خوش نصیب ورکرز کے ناموں کی قرعہ اندازی کی۔

قرعہ اندازی کے ذریعے دس (10) خوش نصیب ورکرز کا انتخاب کیا گیا جنہیں حج بیت اللہ کی سعادت حاصل ہوگی۔ کامیاب ورکرز میں لاہور ڈویڑن سے کوکب جہاں، ڈی جی خان ڈویڑن سے محمد علی، فیصل آباد ڈویڑن سے شبیر حسین، بہاولپور ڈویڑن سے عبدالقادر، ساہیوال ڈویڑن سے محمد منیر، راولپنڈی ڈویڑن سے قمر حسین، گوجرانوالہ ڈویڑن سے محمد لطیف، گجرات ڈویڑن سے عبدالغفور، سرگودھا ڈویڑن سے محمد خان اور ملتان ڈویڑن سے عبدالحمید شامل ہیں۔

(جاری ہے)

صوبائی وزیر فیصل ایوب کھوکھر نے قرعہ اندازی کے ذریعے منتخب ہونے والے خوش نصیب ورکرز کو مبارک باد دیتے ہوئے کہا کہ پہلے صرف چار ورکرز حج پر جاتے تھے اب وزیرِ اعلیٰ پنجاب کے مزدور دوست ویڑن کے تحت یہ کوٹہ بڑھا کر دس کر دیا گیا ہے۔ انہوں نے بتایا کہ حج پر جانے والے ورکرز کے تقریباً پندرہ ملین روپے کے اخراجات پنجاب سوشل سکیورٹی برداشت کرے گی۔

اس موقع پر کمشنر پنجاب سوشل سکیورٹی محمد علی نے بھی منتخب ہونے والے خوش نصیب ورکرز کو مبارک باد دی اور کہا کہ یہ اقدام مزدوروں کی فلاح و بہبود کی سمت ایک اہم قدم ہے۔تقریب کے دوران صوبائی وزیر کو بریفنگ دی گئی کہ پنجاب کی تمام ڈویڑنز سے کل 1055 درخواستیں موصول ہوئیں، جن میں سے میرٹ پر آنے والی درخواستوں کو قرعہ اندازی میں شامل کیا گیا۔ مزید بتایا گیا کہ پنجاب کی ہر ڈویڑن سے ورکرز کا منصفانہ انتخاب عمل میں لایا گیا ہے۔