کمشنر ملتان عامر کریم خاں کی زیر صدارت ترقیاتی سکیموں بارے جائزہ اجلاس

ہفتہ 11 اکتوبر 2025 17:41

ملتان (اُردو پوائنٹ اخبارتازہ ترین - اے پی پی۔ 11 اکتوبر2025ء) کمشنر ملتان عامر کریم خاں کی زیر صدارت کارپوریشن کی ترقیاتی سکیموں پر ہفتہ کو جائزہ اجلاس منعقد ہوا۔اس موقع پر شہر میں مختلف ترقیاتی کاموں کا جائزہ لیا گیا۔کمشنر نے گردیزی مارکیٹ میں واش رومز کی تعمیر سے متعلق عوامی شکایات پر نوٹس لیتے ہوئے ڈائریکٹر ڈویلپمنٹ مبشر الرحمن کو موقع پر دورہ کرکے رپورٹ پیش کرنے کی ہدایت کی۔

انہوں نے حسین آگاہی میں زیر تعمیر واش رومز جلد مکمل کرنے کی ہدایت کرتے ہوئے کہا کہ تعمیراتی کاموں میں معیار پر سمجھوتہ برداشت نہیں کیا جائے گا۔انہوں نے بتایا کہ آٹھ نمبر پر شہریوں کی سہولت کے لیے انتظار گاہ اور سٹنگ ایریا تیار کیا جا رہا ہے۔ ای بسوں کے لیے میونسپل کارپوریشن حدود میں 49 بس شیڈز تعمیر کئے جائیں گے۔

(جاری ہے)

کمشنر کی پیر خورشید کالونی کی سڑک کی بحالی کے لیے واسا اور میونسپل کارپوریشن کو مشترکہ سکیم بنانے کی ہدایت کی اور کہا کہ اداروں کو باہمی رابطہ بہتر بنا کر ترقیاتی سکیمیں جلد مکمل کرنی چاہئیں۔

اس موقع پر کمشنر کو نشتر روڈ پر رش کم کرنے کے لیے پارکنگ پلان پر بریفنگ دی گئی۔سی او اقبال خاں کی جانب سے دیگر ترقیاتی منصوبوں پر بھی بریفنگ دی گئی۔ڈائریکٹر ڈیویلپمنٹ مبشر الرحمن سمیت متعلقہ حکام بھی موجود تھے۔