گورنرخیبرپختونخوا نے فرنٹئیر انسٹیٹیوٹ آف آپتھامالوجی میں آنکھوں کئے علاج کی جدید ترین پرو سمائل لیزر ٹیکنالوجی کا افتتاح کردیا

ہفتہ 11 اکتوبر 2025 21:48

پشاور(اُردو پوائنٹ اخبارتازہ ترین - این این آئی۔ 11 اکتوبر2025ء) گورنر خیبر پختونخوا فیصل کریم کنڈی نے ہفتہ کے روز اسلام آباد میں فرنٹئیر انسٹیٹیوٹ آف آپتھامالوجی میں آنکھوں کئے علاج کی جدید ترین SMILE Pro لیزر ٹیکنالوجی کابحثیت مہمان خصوصی افتتاح کیا۔ گورنر خیبر پختونخوا نے افتتاحی تقریب میں ڈاکٹر مشتاق احمد خٹک سمیت فرنٹئیر انسٹیٹیوٹ آف آپتھامالوجی کی تمام انتظامیہ، طبی عملہ کوآنکھوں کے علاج کیلئے جدید ترین ٹیکنالوجی متعارف کرانے پر مبارکباد پیش کی۔

تقریب میں ڈاکٹر مشتاق احمد خٹک نے جدید لیزر ٹیکنالوجی سے متعلق گورنر خیبر پختونخوا کو بریفنگ دی، گورنر نے ہسپتال کے نئے بلاک میں جدید لیزر ٹیکنالوجی مشین کا معائینہ بھی کیا اوراس ٹیکنالوجی کو نہ صرف پاکستان بلکہ پورے خطے کے لیے ایک اہم سنگِ میل ثابت قرار دیا۔

(جاری ہے)

افتتاحی تقریب سے خطاب کرتے ہوئے گورنر خیبر پختونخوا نے کہا کہ فرنٹئیر انسٹیوٹ آف آپتھالوجی پشاور، اسلام آباد سمیت دیگر علاقوں میں امراض چشم میں مبتلا افراد کے علاج میں جدید سائنسی طریقوں کو متعارف کرانے میں اہم کردار ادا کر رہا ہے۔

آج کی یہ تقریب بھی اسی سلسلے میں ایک نئے دور کا آغاز ہے۔ انہوں نے کہا کہ FIO کا ادارہ اور نظام صحت سے جڑے دیگر نجی ادارے بلاشبہ ایک صحت مند معاشرے کی تکمیل میں اہم خدمات انجام دے رہے ہیں جو کہ قابل تحسین ہے۔انہوں نے کہا کہ SMILE Pro ٹیکنالوجی دنیا بھر میں بصارت کی بحالی کے محفوظ اور مؤثر ترین طریقوں میں شمار ہوتی ہے، اور یہ خوش آئند بات ہے کہ اب پاکستان میں بھی یہ سہولت دستیاب ہے۔

۔میری نظر میں صحت کا شعبہ صرف ایک سروس نہیں بلکہ ایک قومی فریضہ ہے۔۔ حکومتِ پاکستان اور خیبر پختونخوا کی انتظامیہ ہمیشہ سے صحت عامہ کی بہتری کے لیے پرعزم رہی ہے۔ ایسے ادارے جو تحقیق، مہارت اور جدید سہولیات کے ذریعے عوام کو بینائی کی نعمت لوٹانے میں مصروف ہیں، وہ واقعی قومی خدمت انجام دے رہے ہیں۔