سیلاب متاثرہ علاقوں میں گھریلو صارفین کے اگست کے بجلی بلز معاف

صارفین کو بجلی بلز کی مد میں 17ارب روپے سے زائد کا ریلیف دیا گیا‘ذرائع پاور ڈویژن

اتوار 12 اکتوبر 2025 19:15

اسلام آباد/لاہور(اُردو پوائنٹ اخبارتازہ ترین - این این آئی۔ 12 اکتوبر2025ء) حکومت نے سیلاب متاثرہ علاقوں میں 25 لاکھ سے زائد گھریلو صارفین کے اگست کے بجلی بل معاف کردیئے۔ذرائع پاور ڈویژن کے مطابق فائدہ اٹھانے والوں میں لاہور ،گوجرانوالہ، پشاور، ملتان، فیصل آباد، اسلام آباد اور قبائلی علاقہ جات کے صارفین شامل ہیں،صارفین کو بجلی بلز کی مد میں 17ارب روپے سے زائد کا ریلیف دیا گیا۔

(جاری ہے)

ذرائع کے مطابق گوجرانوالہ الیکٹرک سپلائی کمپنی کے 15لاکھ صارفین جبکہ پشاور الیکٹرک سپلائی کمپنی کے 4لاکھ 75ہزارصارفین کے بلز معاف کئے گئے۔ملتان الیکٹرک سپلائی کمپنی کے 2لاکھ 65ہزار ، اسلام آباد الیکٹرک کمپنی کے 77 ہزار، لاہور کے 48 ہزار اور فیصل آباد الیکٹرک سپلائی کمپنی کے ایک لاکھ 65ہزار صارفین کے بل معاف ہوئے۔ذرائع پاور ڈویژن کے مطابق ٹرائبل الیکٹرک کمپنی کے ایک ہزار صارفین بھی اگست کے بجلی بل ادا نہیں کریں گے جبکہ سکھر الیکٹرک سپلائی کمپنی کے متاثرین کے حوالے سے سروے جاری ہے۔