محمد فاروق کی ڈی آئی جی ٹریفک سے ملاقات ،ْ جناح ایوینیو اور شاہ فیصل کالونی میں ٹریفک مسائل پر تبادلہ خیال

ہیوی ٹریفک پر فوری پابندی عائد ،ْ غیر ضروری جرمانوںکا خاتمہ کیا جائے تاکہ شہریوں اور مقامی کاروباری طبقے کو ریلیف مل سکے ،ْ محمد فاروق ہیوی ٹریفک کی بندش یقینی ،ْ شاہ فیصل کالونی میں ٹریفک بہتر بنانے کے لیے عملی اقدامات کیے جائیں گے ،ْڈی آئی جی ٹریفک پیرمحمدشاہ کی یقین دہانی

اتوار 12 اکتوبر 2025 21:50

کراچی(اُردو پوائنٹ اخبارتازہ ترین - این این آئی۔ 12 اکتوبر2025ء) جماعت اسلامی کے رکن سندھ اسمبلی محمد فاروق نے امیر ضلع محمد اشرفاور ٹاؤن چیئرمین ظفر احمد خان کے ہمراہ ڈی آئی جی ٹریفک پیر محمد شاہ سے ایک اہم ملاقات کی، جس میں شہر کے مختلف علاقوں خصوصاً جناح ایوینیو (ملیر ہالٹ تا ٹینک چوک) اور شاہ فیصل کالونی میں ٹریفک کے سنگین مسائل پر تفصیلی گفتگو کی گئی۔

محمد فاروق نے کہا کہ جناح ایوینیو پر بھاری گاڑیوں کی آمدورفت سے نہ صرف شہریوں کے لیے شدید مشکلات پیدا ہورہی ہیں بلکہ ٹریفک جام اور حادثات میں بھی اضافہ ہو رہا ہے۔ انہوں نے مطالبہ کیا کہ ہیوی ٹریفک پر فوری پابندی عائد کی جائے اور غیر ضروری جرمانوںکا سلسلہ روکا جائے تاکہ عام شہریوں اور مقامی کاروباری طبقے کو ریلیف مل سکے۔

(جاری ہے)

اسی طرح شاہ فیصل کالونی میں شمع شاپنگ سینٹر کے اطراف ٹریفک جام، غیر قانونی پارکنگ اور بھاری گاڑیوں کی آمدورفت کے باعث عوام کو درپیش مشکلات پر بھی تبادلہ خیال کیا گیا۔

ٹاؤن چیئرمین ظفر احمد خان نے کہا کہ شاہ فیصل اور گرد و نواح کے علاقوں میں ٹریفک کی ناقص منصوبہ بندی کی وجہ سے عوام کا روزمرہ معمول متاثر ہو رہا ہے، اس مسئلے کا فوری حل ضروری ہے۔ڈی آئی جی ٹریفک پیر محمد شاہ نے جماعت اسلامی کے رہنماؤں کو یقین دہانی کرائی کہ چند روز میں جناح ایوینیو پر ہیوی ٹریفک کی بندش کو یقینی بنایا جائے گا اور شاہ فیصل کالونی میں ٹریفک کے بہاؤ کو بہتر بنانے کے لیے عملی اقدامات کیے جائیں گے۔

انہوں نے کہا کہ عوامی مسائل کے حل کے لیے شہری نمائندوں کی تجاویز کو ترجیحی بنیادوں پر عمل میں لایا جائے گا۔ملاقات کے اختتام پر جماعت اسلامی کے رہنماؤں نے امید ظاہر کی کہ ٹریفک پولیس اپنے وعدوں پر جلد عمل کرے گی تاکہ عوام کو ریلیف ملے اور شہر میں ٹریفک کی صورتحال میں بہتری آئے۔