موبائل بینکنگ ایپس صارفین کی تعداد ساڑھے 9کروڑ سے زیادہ ہوگئی

پیر 13 اکتوبر 2025 16:54

لاہور(اُردو پوائنٹ اخبارتازہ ترین - این این آئی۔ 13 اکتوبر2025ء) پاکستان میں کیش لیس اکانومی کے فروغ کی جانب پیشرفت جاری ہے۔ موبائل بینکنگ ایپس صارفین کی تعداد ساڑھے 9کروڑ سے زیادہ ہو گئی ۔ ایک کروڑ 77لاکھ پاکستانی انٹرنیٹ بینکنگ پورٹل استعمال کر رہے ہیں۔ ملک بھر میں فوری اور مفت ڈیجیٹل ٹرانزیکشنز سے متعلق راست آئی ڈیز کی تعداد بھی 4 کروڑ 60لاکھ ہو چکی ۔

جون 2026ء تک آن لائن بینکنگ ایپس صارفین کی تعداد 12کروڑ تک لے جانے کا ہدف ہے۔معیشت کو جدید دور کے تقاضوں کے مطابق ڈھالنے کی حکومتی کوششیں کامیاب ہونے لگیں۔ پاکستان میں مجموعی طور پر 19ہزار سے زیادہ بینک برانچز، 7لاکھ برانچ لیس بینکنگ ایجنٹس موجود ہیں ،شہروںمیں بینکوں کا رخ کرنے کے بجائے کیش لیس اکانومی کا رجحان بڑھنے لگا۔

(جاری ہے)

گزشتہ 7سال میں ری ٹیل سیکٹر میں 8ارب ٹرانزیکشنز ڈیجیٹل چینلز کے ذریعے کی گئیں۔

اوور دی کانٹر ٹرانزیکشنز 1.1ارب ریکارڈ کیا گیا جبکہ ملک میں مجموعی 22کروڑ 60لاکھ سے زائد بینک اکائونٹس میں سے 9کروڑ 60لاکھ ڈیپازٹرز ہیں۔دستاویز کے مطابق موبائل بینکنگ ایپس صارفین کی تعداد بڑھ کر 9کروڑ 60لاکھ تک پہنچ گئی۔ 1کروڑ 70لاکھ پاکستانی انٹرنیٹ بینکنگ پورٹل بھی استعمال کر رہے ہیں۔ راست آئی ڈیز کی تعداد 4کروڑ 60 لاکھ ریکارڈ، تو کیو آر کوڈ ہولڈر تاجر ساڑھے آٹھ لاکھ تک پہنچ گئے۔