شہریوں کو معیاری تفریحی سہولیات فراہم کرنا ادارے کی اولین ترجیح ہے،احمد حسن رانجھا

پیر 13 اکتوبر 2025 18:48

راولپنڈی (اُردو پوائنٹ اخبارتازہ ترین - اے پی پی۔ 13 اکتوبر2025ء) ڈائریکٹر جنرل پارکس اینڈ ہارٹیکلچر اتھارٹی (پی ایچ اے) راولپنڈی احمد حسن رانجھا نے کہا ہے کہ شہریوں کو معیاری تفریحی سہولیات فراہم کرنا ادارے کی اولین ترجیح ہے، اس مقصد کے حصول میں کسی قسم کی غفلت یا کوتاہی برداشت نہیں کی جائے گی۔ اپنے ایک بیان میں انہوں نے کہا کہ پی ایچ اے راولپنڈی شہر کو سرسبز، شاداب اور دلکش بنانے کے لیے بھرپور اقدامات کر رہی ہے۔

شہر بھر کے پارکوں، گرین بیلٹس اور اہم شاہراہوں پر پھولوں کی سجاوٹ، پودوں کی نگہداشت اور تزئین و آرائش کا عمل تیزی سے جاری ہے۔ انہوں نے کہا کہ عملہ نہ صرف پارکوں بلکہ چوکوں اور چوراہوں کی بیوٹیفیکیشن پر بھی مسلسل مصروف عمل ہے تاکہ شہریوں کو خوشگوار اور پرامن ماحول میسر آ سکے۔

(جاری ہے)

انہوں نے کہا کہ پی ایچ اے کی نرسریز میں پھولوں اور پودوں کی نگہداشت باقاعدگی سے کی جا رہی ہے جبکہ شہر کے مختلف پارکوں اور گرین بیلٹس پر لگے رنگ برنگے پھول عوام کی توجہ کا مرکز بنے ہوئے ہیں۔

شہریوں کی سہولت کے پیش نظر پارکوں میں بہترین سکیورٹی انتظامات بھی یقینی بنائے گئے ہیں تاکہ اہل راولپنڈی بلاخوف و خطر تفریحی سرگرمیوں سے لطف اندوز ہو سکیں۔ ڈی جی پی ایچ اے نے کہا کہ شہر کو سرسبز و شاداب بنانے اور ماحولیاتی آلودگی کے خاتمے کے لیے شجرکاری مہم بھرپور انداز میں جاری ہے۔ انہوں نے کہا کہ پنجاب حکومت کے ویژن کے مطابق راولپنڈی میں اپ گریڈیشن اور بیوٹیفیکیشن کے متعدد منصوبوں پر کام تیزی سے جاری ہے جن سے نہ صرف شہر کی خوبصورتی میں اضافہ ہو گا بلکہ شہریوں کو ایک صحت مند، پرسکون اور خوشگوار تفریحی ماحول بھی میسر آئے گا۔

Facebook Twitter Google + Share on Whatsapp

شہریوں کو معیاری تفریحی سہولیات فراہم کرنا ادارے کی اولین ترجیح ہے،احمد حسن رانجھا

متعلقہ عنوان :

مزید قومی خبریں