گھانا فٹ بال ٹیم نے فیفا ورلڈ کپ 2026 کے لئے کوالیفائی کرلیا

منگل 14 اکتوبر 2025 17:07

کواکرا(اُردو پوائنٹ اخبارتازہ ترین - این این آئی۔ 14 اکتوبر2025ء) کو اکرا میں کھیلے گئے اہم میچ میں گھانا کی فٹ بال ٹیم نے کوموروس کو انتہائی سخت مقابلے کے بعد 0-1 گول سے ہراکر فیفا ورلڈ کپ 2026 کے لیے کوالیفائی کر لیا۔رپورٹس کے مطابق اس فتح کے ساتھ ہی گھانا افریقا سے ورلڈ کپ کے لیے کوالیفائی کرنے والی پانچویں ٹیم بن گئی ہے،اس سے قبل الجزائر، مصر، مراکش اور تیونس پہلے ہی اپنی جگہ پکی کر چکے ہیں۔

میچ کے 47 ویں منٹ میں محمد قدوس نے گول کر کے اپنی ٹیم کو برتری دلوائی، جو میچ کے اختتام تک برقرار رہی۔گھانا نے پہلے ہاف میں میدان اور گیند پر مکمل کنٹرول رکھا، لیکن ان کے حملے سست تھے، جس کے باعث کوموروس کے گول کیپر عادل انزیماتی ابودو کو زیادہ مشکل پیش نہیں آئی۔گھانا کے لیے یہ کامیابی اس لیے بھی اہمیت رکھتی ہے کیونکہ کوموروس نے 2022 کے افریقا کپ آف نیشنز (اے ایف سی او این) میں گھانا کو حیران کن شکست دی تھی اور ورلڈ کپ کوالیفائنگ کے دوسرے راؤنڈ میں بھی انہیں شکست سے دوچار کیا تھا۔

(جاری ہے)

گھانا نے 10 میچز میں 25 پوائنٹس حاصل کر کے گروپ I میں پہلی پوزیشن حاصل کی، جبکہ مڈغاسکرکی ٹیم 19 پوائنٹس کے ساتھ دوسرے نمبر پر رہی، اگرچہ اسے تیسرے نمبر پر موجود مالی کے ہاتھوں 1-4 کی شکست کا سامنا کرنا پڑا۔بلیک سٹارز کی یہ پانچویں مرتبہ عالمی کپ میں شرکت ہوگی۔ گھاناکی ٹیم کی بہترین کارکردگی 2010 کے جنوبی افریقا ورلڈ کپ میں دیکھی گئی، جب وہ کوارٹر فائنل میں یوراگوئے سے پنالٹی شوٹ آؤٹ میں شکست کے بعد میگا ایونٹ سے باہر ہوگئی تھی۔

اس کامیابی نے کوچ اوٹو ایڈو پر گھانا فٹبال فیڈریشن کے اعتماد کو درست ثابت کر دیا، جنہیں گزشتہ سال خراب کارکردگی کے بعد شدید تنقید کا سامنا کرناپڑا تھا۔گھانا کی ٹیم نے افریقہ کپ آف نیشنز 2025 کے کوالیفائنگ میچز میں ایک بھی کامیابی حاصل نہیں کی تھی اور انگولا، سوڈان اور نائجر کے بعد گروپ میں آخری نمبر پر رہی تھی۔