آسٹریلیا کی معروف تیراک اور 4 مرتبہ کی اولمپک گولڈ میڈلسٹ آریارنے ٹٹمس کا اچانک ریٹائرمنٹ کا اعلان

جمعرات 16 اکتوبر 2025 12:59

سڈنی (اُردو پوائنٹ اخبارتازہ ترین - این این آئی۔ 16 اکتوبر2025ء) آسٹریلیا کی معروف تیراک اور 4 مرتبہ کی اولمپک گولڈ میڈلسٹ آریارنے ٹٹمس نے محض 25 سال کی عمر میں اچانک ریٹائرمنٹ کا اعلان کرکے مداحوں کو حیران کر دیا۔آسٹریلوی میڈیا کے مطابق 4 مرتبہ کی اولمپک گولڈ میڈلسٹ آریارنے ٹٹمس نے فوری ریٹائرمنٹ کا اعلان کیا ہے۔آریارنے ٹٹمس نے سوشل میڈیا کے ذریعے اعلان کیا کہ انہوں نے 18 سال سوئمنگ میں گزارے اور 10 برس ملک کو دیے مگر یہ ایک مشکل فیصلہ ہے لیکن وہ اس سے خوش ہیں۔

(جاری ہے)

انہوں نے کہا کہ میں نے ہمیشہ سوئمنگ سے پیار کیا ہے لیکن ایک وقت آیا جب سوئمنگ سے بڑھ کر بھی کچھ دیکھنا پڑتا ہے، کینسر کا خوف میرے لیے ٹرننگ پوائنٹ تھا اور میں دماغی طور پر متاثر ہوئی۔واضح رہے کہ پیرس اولمپکس سے قبل آریارنے ٹٹمس کو کینسر کے ٹیومر کی سرجری کرانا پڑی تھی۔آریارنے ٹٹمس 1964 کے بعد آسٹریلیا کی پہلی سوئمر تھیں جنہوں نے بیک ٹو بیک اولمپک گولڈ ایک ایونٹ میں جیتا تھا۔انہوں نے پیرس اولمپکس میں 2 سابقہ ورلڈ ریکارڈ ہولڈرز کو ہرا کر 400 میٹر فری اسٹائل میں گولڈ میڈل حاصل کیا تھا جب کہ آریارنے ٹٹمس نے ٹوکیو اور پیرس اولمپکس میں مجموعی طور پر 8 میڈلز اپنے نام کیے، وہ 200 اور 400 میٹر فری اسٹائل میں ورلڈ ریکارڈ ہولڈر ہیں۔