پہلے 20 ٹیسٹ میچز میں زیادہ بار اننگز میں 5 شکار، نعمان علی تمام پاکستانی سپنرز کو پیچھے چھوڑ گئے

39 سالہ نعمان علی نے جنوبی افریقہ کیخلاف لاہور ٹیسٹ میں میچ میں مجموعی طور پر 10 وکٹیں حاصل کیں

ذیشان مہتاب جمعرات 16 اکتوبر 2025 15:01

پہلے 20 ٹیسٹ میچز میں زیادہ بار اننگز میں 5 شکار، نعمان علی تمام پاکستانی ..

لاہور (اردو پوائنٹ تازہ ترین اخبار ۔ 16 اکتوبر 2025ء ) قومی ٹیم کے تجربہ کار لیفٹ آرم سپنر نعمان علی وقار یونس کے بعد اپنے پہلے 20 ٹیسٹ میچز میں زیادہ بار اننگز میں 5 وکٹیں لینے والے ملکی باولر بن گئے ہیں۔

39 سالہ نعمان علی نے جنوبی افریقہ کیخلاف لاہور ٹیسٹ میں میچ میں مجموعی طور پر 10 وکٹیں حاصل کیں، یہ ان کے کیریئر میں تیسرا موقع تھا جب انہوں نے میچ میں 10 یا زیادہ شکار کیے۔

نعمان علی اب تک اپنے ٹیسٹ کیریئر میں 20 میچز میں 24.15 کی اوسط سے 93 وکٹیں حاصل کرچکے ہیں جس میں 9 مرتبہ اننگز میں 5 وکٹیں اور 3 مرتبہ میچ میں 10 وکٹیں لینا شامل ہے، وہ وقار یونس کے بعد اپنے پہلے 20 میچز میں ایک ٹیسٹ اننگز میں سب سے زیادہ مرتبہ 5 یا زیادہ وکٹیں لینے والے پاکستانی باولر ہیں۔

(جاری ہے)

وقار یونس نے 1989ء سے 1993ء کے درمیان اپنے پہلے 20 ٹیسٹ میچز میں ایک اننگز میں 11 مرتبہ 5 یا زیادہ کھلاڑی آئوٹ کیے تھے۔

نعمان علی سابق ٹیسٹ کرکٹر فضل محمود کا 67 سالہ قومی ریکارڈ بھی توڑ چکے ہیں۔

وہ فضل محمود کے بعد محض دوسرے پاکستانی باولر بنے ہیں جنہوں نے اپنے پہلے 20 ٹیسٹ میچز میں 3 مرتبہ میچ میں 10 یا زیادہ وکٹیں حاصل کی ہیں۔

فضل محمود نے 1952ء سے 1958ء کے درمیان یہ کارنامہ سرانجام دیا تھا۔

اس سے قبل نعمان علی نے جنوبی افریقا کے خلاف قذافی اسٹیڈیم میں کھیلے گئے پہلے ٹیسٹ میں سابق لیجنڈ اسپنر عبدالقادر کا 37 سال پرانا ریکارڈ بھی توڑ دیا تھا۔

نعمان علی 5 ٹیسٹ کے تسلسل میں سب سے زیادہ وکٹیں لینے والے پاکستانی بولر بن گئے، انہوں نے کیریئر کے 16ویں سے 20 ویں ٹیسٹ کے دوران 46 وکٹیں حاصل کیں۔

عبد القادر نے 1987ء اور 88ء میں کیرئیر کے 48 ویں سے 52 ویں ٹیسٹ میں 44 وکٹیں لی تھیں۔

پاکستان کے نعمان علی پچھلے 12 ماہ کے دوران دنیا کے سب سے کامیاب اسپنر بھی ہیں۔ نعمان علی نے جنوبی افریقا کے خلاف لاہور ٹیسٹ میں 10 وکٹیں لیں، انہوں نے پہلی اننگز میں 6 جب کہ دوسری اننگز میں 4 شکار کیے۔

اس سال کے آغاز میں ویسٹ انڈیز کے خلاف پہلے ٹیسٹ میں انہوں نے 6 اور دوسرے ٹیسٹ میں 10 وکٹیں لی تھیں جبکہ انگلینڈ نے خلاف سیریز میں نعمان علی نے ملتان میں 11 اور راولپنڈی میں 9 کھلاڑیوں کو آؤٹ کیا تھا۔

یاد رہے کہ پاکستانی سپنر نعمان علی نے گزشتہ روز ٹیسٹ میچ کے تیسرے روز بھی اپنا نام ریکارڈ بک میں درج کرایا تھا۔ انہوں نے قذافی اسٹیڈیم میں جنوبی افریقا کے خلاف سابق پاکستانی اسپنر اقبال قاسم کا 37 سالہ پرانا ٹیسٹ ریکارڈ توڑا تھا۔

39 سالہ نعمان علی نے جنوبی افریقا کی پہلی اننگز میں 6 وکٹیں حاصل کیں، انہوں نے اپنے ٹیسٹ کیریئر میں 9 ویں بار ایک اننگ میں 5 یا اس سے زائد وکٹیں لیں، وہ ٹیسٹ کرکٹ کی اننگ میں سب سے زیادہ مرتبہ 5 وکٹیں لینے والے پاکستانی لیفٹ آرم اسپنر بن گئے۔