ڈیجیٹل تبدیلی سے شفافیت، استعداد کار میں نمایاں بہتری آئے گی، کامران افریدی

جمعرات 16 اکتوبر 2025 23:02

پشاور (اُردو پوائنٹ اخبارتازہ ترین - اے پی پی۔ 16 اکتوبر2025ء) سیکرٹری ہائیر ایجوکیشن ڈیپارٹمنٹ خیبر پختونخوا کامران آفریدی نے خیبر میڈیکل یونیورسٹی (کے ایم یو)اور وائس چانسلر پروفیسر ڈاکٹر ضیاءالحق کی اعلیٰ قیادت کو تعلیمی شعبے میں مکمل ڈیجیٹل تبدیلی کی جانب نمایاں اقدامات اٹھانے پر سراہا۔ انہوں نے کہا کہ یہ ایک اہم سنگِ میل ہے کیونکہ کے ایم یو نے انٹرپرائز ریسورس پلاننگ سسٹم کے کامیاب نفاذ کے ذریعے مکمل طور پر ڈیجیٹل نظام میں تبدیلی حاصل کر لی ہے۔

یہ اقدام ہائر ایجوکیشن کمیشن کے اس ویژن کے تحت شروع کیا گیا جس کے مطابق ملک بھر کی جامعات کو ٹیلی مارکس کنسلٹنگ کے اشتراک سے ڈیجیٹل نظام پر منتقل کیا جا رہا ہے۔ کامران افریدی نےکہا کہ کے ایم یو نے قیادت کا کردار ادا کرتے ہوئے سب سے پہلے ایچ ای سی کے ساتھ مفاہمتی یادداشتِ پر دستخط کیے اور جامعہ کے تمام انتظامی و تدریسی شعبوں میں ای آر پی سسٹم کو کامیابی سے نافذ کیا۔

(جاری ہے)

اس موقع پر سیکرٹری ہائیر ایجوکیشن ڈیپارٹمنٹ کامران آفریدی نے پروفیسر ڈاکٹر ضیاءالحق اور ان کی ٹیم کی جدت پسندی، انتظامی شفافیت اور ادارہ جاتی بہتری کے جذبے کی تعریف کی۔ انہوں نے کہا کہ ای آر پی سسٹم کے ذریعے مالی امور (ڈبل انٹری سسٹم)، انسانی وسائل کا انتظام، خریداری کے عمل اور طلباء کے تمام معاملات داخلے سے ڈگری کے اجراء تک مکمل طور پر ڈیجیٹل ہو گئے ہیں۔

انہوں نے مزید کہا کہ کے ایم یو ہمیشہ حکومتی سطح پر متعارف کردہ اصلاحاتی اقدامات میں سبقت رکھتی ہے اور دیگر جامعات کے لیے ایک قابلِ تقلید مثال بن چکی ہے۔ اس ڈیجیٹل اقدام سے شفافیت، کارکردگی اور جوابدہی میں نمایاں اضافہ ہوگا اور صوبے میں کاغذ سے پاک، ٹیکنالوجی پر مبنی اعلیٰ تعلیمی نظام کی راہ ہموار ہوگی۔