پاکستان پیپلز پارٹی عوامی جماعت ، ہمیشہ غریب اور پسماندہ طبقے کی آواز بنی رہی ہے،رکن صوبائی اسمبلی حاجی علی مدد جتک

جمعرات 16 اکتوبر 2025 23:01

کوئٹہ (اُردو پوائنٹ اخبارتازہ ترین - اے پی پی۔ 16 اکتوبر2025ء) پاکستان پیپلز پارٹی کے مرکزی کمیٹی کے رکن و رکن صوبائی اسمبلی حاجی علی مدد جتک سے حلقہ کے مختلف علاقوں سے آئے عوام نے ملاقات کی اور اپنے مسائل سے آگاہ کیا۔ اس موقع پر حاجی علی مدد جتک نے عوام کے مسائل نہایت توجہ سے سنے اور ان کے فوری حل کے لیے متعلقہ محکموں کو ہدایات جاری کیں۔

(جاری ہے)

عوام نے شکایت کی کہ علاقے میں ترقیاتی کاموں میں سستی، صفائی ستھرائی کے ناقص انتظامات، پینے کے پانی کی قلت اور بجلی کے مسائل درپیش ہیں۔ اس پر حاجی علی مدد جتک نے کہا کہ وہ عوام کے خادم ہیں اور ان کی ہر ممکن خدمت ان کی ترجیحات میں شامل ہے۔انہوں نے مزید کہا کہ پاکستان پیپلز پارٹی عوامی جماعت ہے جو ہمیشہ غریب اور پسماندہ طبقے کی آواز بنی رہی ہے۔ انہوں نے یقین دلایا کہ سریاب کے تمام علاقوں میں ترقیاتی منصوبوں کا دائرہ وسیع کیا جائے گا تاکہ یہاں کے عوام کو بنیادی سہولیات ان کی دہلیز پر فراہم کی جا سکیں۔عوام کی بڑی تعداد نے اپنے مسائل بغور سننے اور ان کے حل کیلئے احکامات جاری کرنے پر حاجی علی مدد جتک کا شکریہ ادا کیا۔