صوبائی وزیر ہائوسنگ بلال یاسین کاڈی جی واسا پنجاب اور ایم ڈی واسا لاہور کے ہمراہ شہر بھر میں جاری انسدادِ سموگ سرگرمیوں کا تفصیلی جائزہ

اتوار 19 اکتوبر 2025 23:00

لاہور (اُردو پوائنٹ اخبارتازہ ترین - اے پی پی۔ 19 اکتوبر2025ء) وزیر اعلی پنجاب کے وژن کی روشنی میں واسا لاہور سموگ کے تدارک کے لیے پنجاب حکومت کے ہم قدم ہے۔وزیر اعلی پنجاب کے وژن کے تحت صوبائی وزیر ہائوسنگ بلال یاسین نے ڈی جی واسا پنجاب طیب فرید اور ایم ڈی واسا لاہور غفران احمد کے ہمراہ شہر بھر میں جاری انسدادِ سموگ سرگرمیوں کا تفصیلی جائزہ لیا۔

صوبائی وزیر ہائوسنگ نے غوث اعظم روڈ، مین بلیوارڈ فیصل ٹائون، اور خیابانِ فردوسی جوہر ٹائون کے مختلف مقامات کا دورہ کیا جہاں انہوں نے واسا لاہور کی جانب سے پانی کے چھڑکا ئواور صفائی کے عمل کا معائنہ کیا۔ اس موقع پر انہیں بریفنگ دی گئی کہ واسا لاہور روزانہ کی بنیاد پر مختلف سڑکوں پر چھڑکا ئوکر رہا ہے تاکہ سموگ کے اثرات میں نمایاں کمی لائی جا سکے۔

(جاری ہے)

ایم ڈی واسا نے بتایا کہ واسا لاہور اپنے تمام وسائل بروئے کار لا کر سموگ کے خاتمے اور شہریوں کے لیے صاف اور صحت مند ماحول کی فراہمی کے لیے پرعزم ہے۔ انہوں نے کہا کہ واسا کی ٹیمیں صبح و شام کے اوقات میں مختلف شاہراہوں پر پانی کا چھڑکا ئوکر رہی ہیں تاکہ گردوغبار کم کیا جا سکے۔صوبائی وزیر ہائوسنگ بلال یاسین نے موقع پر ہی متعلقہ حکام کو ہدایات جاری کرتے ہوئے کہا کہ تمام ترقیاتی منصوبوں کے مقامات پر پانی کے باقاعدہ چھڑکا ئوکو یقینی بنایا جائے اس کے علاوہ تعمیراتی ملبہ، مٹی اور گردوغبار کے فوری خاتمے کے لیے خصوصی ٹیمیں تعینات کی جائیں۔

شہری علاقوں میں صفائی کے عمل کو مزید تیز کیا جائے اور واسا، ایل ڈبلیو ایم سی اور ٹریفک پولیس کے مابین موثر کوآرڈینیشن برقرار رکھی جائے۔ مزید برآں عوامی آگاہی مہم کے ذریعے شہریوں کو بھی سموگ کے تدارک کی سرگرمیوں میں شامل کیا جائے۔صوبائی وزیر ہائوسنگ بلال یاسین نے خیابانِ فردوسی جوہر ٹائون میں ٹرنک سیوریج سسٹم کے منصوبے کا بھی معائنہ کیا اور جاری ترقیاتی کاموں پر کام کی رفتار کو تیز کرنے کی ہدایات دیں۔انہوں نے کہا کہ وزیر اعلی پنجاب مریم نواز شریف کی ہدایت پر لاہور کو سموگ فری شہر بنانے کے لیے تمام ادارے مشترکہ حکمتِ عملی کے تحت سرگرم عمل ہیں، اور حکومت پنجاب شہریوں کو صحت مند اور صاف ماحول فراہم کرنے کے لیے ہر ممکن اقدامات جاری رکھے ہوئے ہے۔