قائد اعظم ٹرافی کرکٹ ٹورنامنٹ کے تیسرے راؤنڈ میں پشاور نے بہاولپور کو ہرا دیا

راولپنڈی (اُردو پوائنٹ اخبارتازہ ترین - اے پی پی۔ 20 اکتوبر2025ء) قائد اعظم ٹرافی کرکٹ ٹورنامنٹ کے تیسرے راؤنڈ میں پشاور نے بہاولپور کو ہرا دیا۔ ملتان کے عرفات منہاس نے اپنے کیریئر کی پہلی فرسٹ کلاس سنچری اسکور کر کے سب کی توجہ حاصل کر لی۔ پی سی بی کے مطابق شعیب اختر اسٹیڈیم میں کھیلے گئے میچ میں پشاور نے بہاولپور کے خلاف 8 وکٹوں سے کامیابی حاصل کی۔

میچ کے تیسرے روز بہاولپور کی ٹیم اپنی دوسری اننگز میں 261 رنز بنا کر آؤٹ ہو گئی۔ سعد خان اور مبصر خان نے نصف سنچریاں اسکور کیں، افتخار احمد نے 5 کھلاڑیوں کو آؤٹ کیا۔ پشاور کو 114 رنز کا ہدف ملا جو اس نے 2 وکٹوں کے نقصان پر حاصل کر لیا۔ عامر برکی نے 71 رنز کی ناقابل شکست اننگز کھیلی۔ مرغزار گراؤنڈ میں ایبٹ آباد نے اسلام آباد کے خلاف اپنی دوسری اننگز 314 رنز 9 کھلاڑی آؤٹ پر ڈکلیئر کر دی۔

(جاری ہے)

فخر زمان 74، احمد خان 57، یاسر خان 56 اور محمد بلال 54 رنز کے ساتھ نمایاں رہے۔ اسلام آباد کو جیت کے لیے 524 رنز کا مشکل ہدف ملا۔ جواب میں اسلام آباد نے کھیل کے اختتام پر 2 وکٹوں پر 234 رنز بنا لئے۔ راجہ حمزہ وحید نے شاندار سنچری اسکور کی اور وہ 112 رنز پر ناٹ آؤٹ ہیں جبکہ شامل حسین 81 رنز پر ان کا ساتھ دے رہے ہیں۔ فاٹا کی ٹیم کراچی بلوز کے خلاف اپنی دوسری اننگز میں 190 رنز بنا کر آؤٹ ہو گئی۔

محمد عثمان نے 56 اور محمد فاروق نے 54 رنز بنائے۔ کراچی بلوز کی جانب سے محمد اصغر اور ثاقب خان نے چار ، چار وکٹیں حاصل کیں۔ کراچی بلوز کو جیت کے لیے 296 رنز کا ہدف ملا اور کھیل ختم ہونے پر اس نے 4 وکٹوں کے نقصان پر 67 رنز بنا لئے۔ ڈائمنڈ گراؤنڈ میں سیالکوٹ نے لاہور وائٹس کے خلاف اپنی دوسری اننگز 402 رنز 6 کھلاڑی آؤٹ پر ڈکلیئر کر دی۔ محسن ریاض 100 رنز بنا کر ناٹ آؤٹ رہے جبکہ محمد ہریرہ 90، عاشر محمود 79 اور ایاز تصور 59 رنز کے ساتھ نمایاں رہے۔

لاہور وائٹس کو جیت کے لیے 390 رنز کا ہدف ملا، کھیل ختم ہونے پر اس نے ایک وکٹ کے نقصان پر 18 رنز بنائے تھے۔ ملتان کی ٹیم نے فیصل آباد کے خلاف اپنی پہلی اننگز 551 رنز 9 کھلاڑی آؤٹ پر ڈکلیئر کر دی۔ 20 سالہ عرفات منہاس نے شاندار بیٹنگ کا مظاہرہ کیا اور اپنی پہلی فرسٹ کلاس سنچری مکمل کی۔ انہوں نے 22 چوکوں اور 3 چھکوں کی مدد سے ناقابل شکست 152 رنز بنائے۔ علی عثمان نے 63 رنز کی اننگز کھیلی۔ فیصل آباد نے دوسری اننگز میں 5 وکٹوں پر 223 رنز بنائے تھے، عاصم علی ناصر 85 رنز پر ناٹ آؤٹ ہیں۔