فاؤنڈیشن کے زیراہتمام“تمباکو نوشی اور جدید نشوں کی روک تھام”کے موضوع پر سیمینار

جمعرات 27 نومبر 2025 20:40

راولپنڈی (اُردو پوائنٹ اخبارتازہ ترین - اے پی پی۔ 27 نومبر2025ء) عورت فاؤنڈیشن راولپنڈی کے زیراہتمام“تمباکو نوشی اور جدید نشوں کی روک تھام”کے موضوع پرسیمینار منعقد ہوا۔سیمینار میں پارلیمانی سیکرٹری اطلاعات و ثقافت پنجاب شازیہ رضوان نے بطور مہمانِ خصوصی شرکت کی۔شازیہ رضوان نے کہا کہ نشہ ایک سماجی اور قومی مسئلہ ہے جس کا مقابلہ صرف قانون سازی سے نہیں بلکہ والدین، اساتذہ، میڈیا اور کمیونٹی کی مشترکہ ذمہ داری سے کیا جا سکتا ہے۔

انہوں نے کہا کہ پنجاب حکومت تمباکو نوشی کے خلاف مؤثر قوانین پر عملدرآمد کے ساتھ ساتھ عوامی آگاہی مہمات کو بھی مزید مضبوط کر رہی ہے۔ انہوں نے جدید نشوں کے پھیلاؤ کو نوجوانوں کے مستقبل کے لیے خاموش خطرہ قرار دیتے ہوئے کہا کہ نوجوان نسل کو اس رجحان سے بچانے کے لیے فوری آگاہی اور رہنمائی ناگزیر ہے۔

(جاری ہے)

تقریب میں سول سوسائٹی، تعلیمی اداروں، نوجوان رضا کاروں، اور صحت عامہ کے ماہرین کی بڑی تعداد شریک ہوئی۔

مقررین نے خطاب کرتے ہوئے کہا کہ روایتی تمباکو نوشی کے نقصانات پوری دنیا میں تسلیم شدہ ہیں تاہم گزشتہ چند برسوں میں جدید اور مصنوعی اقسام کے نشوں کا پھیلاؤ نوجوان نسل کے لیے ایک نیا اور سنجیدہ چیلنج بن کر سامنے آیا ہے۔ماہرین نے بتایا کہ عالمی سطح پر بعض جدید نشہ آور رجحانات کو سوشل میڈیا کے ذریعے ”فیشن“ بنا کر پیش کیا جا رہا ہے جس سے کم عمر نوجوان تیزی سے متاثر ہو رہے ہیں۔

مقررین نے خبردار کیا کہ اس طرح کے نشے ذہنی صحت، فیصلہ سازی، تعلیمی کارکردگی اور معاشرتی رویوں پر سنگین اثرات مرتب کرتے ہیں جنہیں روکنے کے لیے فوری اور ٹھوس حکومتی و سماجی اقدامات ضروری ہیں۔تقریب کے آخر میں سوال و جواب کا سیشن ہوا اور شرکاء نے نوجوانوں میں بڑھتے ہوئے نشہ آور رجحانات کے تدارک کے لیے متعدد تجاویز پیش کیں۔