وزیراعلیٰ خیبرپختونخواہ نے شہداء کے ورثاء کی امدادی رقم بڑھادی، 50 لاکھ کی بجائے 1 کروڑ روپے کا اعلان

زخمی اہلکار کیلئے امدادی رقم 10 لاکھ سے بڑھا کر 25 لاکھ روپے کردی گئی، شہداء ہمارا فخر ہیں، خیبر پختونخواہ حکومت ورثاء کا بھرپور خیال رکھے گی؛ سہیل آفریدی کی شہداء کے ورثاء سے ملاقات میں گفتگو

ساجد علی منگل 16 دسمبر 2025 13:23

وزیراعلیٰ خیبرپختونخواہ نے شہداء کے ورثاء کی امدادی رقم بڑھادی، 50 ..

پشاور (اُردو پوائنٹ اخبارتازہ ترین۔ 16 دسمبر2025ء) وزیراعلیٰ خیبرپختونخواہ سہیل آفریدی نے شہداء کے ورثاء کی امدادی رقم بڑھاتے ہوئے 50 لاکھ کی بجائے 1 کروڑ روپے دینے کا اعلان کردیا۔ تفصیلات کے مطابق وزیراعلیٰ خیبر پختونخواہ سہیل آفریدی کی جانب سے شہید ہونے والے فورسز کے ورثاء کے لیے مالی امداد میں مزید اضافے کا اعلان کیا گیا ہے، یہ اعلان اس وقت سامنے آیا جب سہیل آفریدی سے مئی 2025ء کے بھارتی بزدلانہ حملے میں خیبر پختونخواہ سے فورسز کے شہداء کے ورثاء نے ملاقات کی۔

اس موقع پر وزیراعلیٰ نے کہا کہ خیبر پختونخواہ حکومت شہداء کے اہلخانہ کے ساتھ ہر قدم پر مکمل تعاون کے ساتھ شانہ بشانہ کھڑی ہے، صوبائی حکومت شہداء کے ورثاء کے لیے کابینہ سے منظور شدہ 50 لاکھ روپے کی رقم میں 50 لاکھ روپے مزید اضافے کا اعلان کرتی ہے۔

(جاری ہے)

انہوں نے بتایا کہ جنگ میں خیبر پختونخواہ سے زخمی اہلکاروں کے لیے امدادی رقم 10 لاکھ سے بڑھا کر 25 لاکھ روپے فی کس کرنے کا بھی اعلان کیا ہے، خیبر پختونخواہ کے عوام کی لازوال قربانیاں ملک و قوم کی سلامتی کی ضمانت ہیں حق کی راہ میں شہید کبھی نہیں مرتے، شہادت مسلمان کے لیے سب سے اعلیٰ اور مثالی موت ہے، شہداء ہمارا فخر ہیں، خیبر پختونخواہ حکومت ان کے ورثاء کا بھرپور خیال رکھے گی۔

علاوہ ازیں وزیراعلیٰ خیبرپختونخواہ سہیل آفریدی نے منگل کے روز لیڈی ریڈنگ ہسپتال پشاور کا بھی اچانک دورہ کیا جہاں شہریوں نے ہسپتال انتظامیہ کے خلاف شکایات کے انبار لگا دیئے، شہریوں کا کہنا تھا کہ ہسپتال میں مریض رلتے رہتے ہیں، انتظامیہ اور عملہ دورانِ ڈیوٹی موبائل فون کے استعمال میں مصروف رہتا ہے جس کے باعث علاج معالجے میں شدید مشکلات کا سامنا ہے۔

وزیر اعلیٰ نے شکایات کا نوٹس لیتے ہوئے کہا کہ آج کے بعد ہسپتال انتظامیہ، سرکاری سکول اساتذہ اور تمام سرکاری ملازمین دورانِ ڈیوٹی موبائل فون استعمال نہیں کریں گے، عوام اگر کسی ڈاکٹر یا عملے کو ڈیوٹی کے دوران موبائل استعمال کرتے دیکھیں تو اس کی ویڈیو بنا کر بھیجیں تاکہ فوری کارروائی کی جائے، آپ شکایت بھیجیں باقی کام میرا ہے، ہم شکایت سیل کو فعال بنانے جا رہے ہیں تاکہ عوام کی شکایات کا فوری ازالہ ممکن بنایا جا سکے۔