ملک بھر میں سردی اور دھند برقرار، پہاڑی علاقوں میں شدید سردی

منگل 13 جنوری 2026 22:02

لاہور(اُردو پوائنٹ اخبارتازہ ترین - آن لائن۔ 13 جنوری2026ء) محکمہ موسمیات نے پیش گوئی کی ہے کہ آئندہ 24 گھنٹے کے دوران ملک کے بیشتر علاقوں میں موسم سرد اور خشک رہے گا، جبکہ پہاڑی علاقوں میں شدید سردی برقرار رہنے کا امکان ہے۔محکمہ موسمیات کے مطابق پنجاب، بالائی سندھ اور خیبرپختونخوا کے میدانی علاقوں میں درمیانی سے شدید دھند چھائی رہے گی، جبکہ خطہ پوٹھوہار اور کشمیر میں صبح کے اوقات میں کہرا پڑنے کا امکان ظاہر کیا گیا ہے۔

شہر لاہور میں دھند کے باعث حدِ نگاہ کم ہونے سے ٹریفک اور روزمرہ معمولات متاثر ہو رہے ہیں۔ محکمہ موسمیات کے مطابق لاہور کا موجودہ درجہ حرارت 5 ڈگری سینٹی گریڈ، ہوا میں نمی 94 فیصد جبکہ دو کلومیٹر فی گھنٹہ کی رفتار سے ہوائیں چل رہی ہیں۔

(جاری ہے)

آئندہ 24 گھنٹوں کے دوران بارش کا کوئی امکان نہیں تاہم دھند اور سردی کی شدت برقرار رہنے کی پیش گوئی کی گئی ہے۔

محکمہ موسمیات کے ماہرین کا کہنا ہے کہ 16 جنوری سے مغربی ہوائیں بالائی علاقوں میں داخل ہوں گی، جس کے بعد لاہور اور گردونواح میں ہلکی بارش کا امکان ہے۔ شہریوں کو غیر ضروری سفر سے گریز اور دورانِ سفر احتیاطی تدابیر اختیار کرنے کی ہدایت کی گئی ہے۔ادھر ملک کے شمالی علاقوں گلگت بلتستان اور کشمیر میں مطلع جزوی طور پر ابر آلود رہنے کے ساتھ چند مقامات پر ہلکی بارش اور برفباری متوقع ہے۔

آج کم سے کم درجہ حرارت سکردو میں منفی 13، لہہ اور استور میں منفی 11، گوپس میں منفی 9 اور گلگت میں منفی 8 ڈگری سینٹی گریڈ ریکارڈ کیا گیا۔دیگر شہروں میں اسلام آباد میں 0، کوئٹہ منفی 1، مری منفی 1، لاہور 2، کراچی 8، سکھر 3، مٹھی 0، پشاور 1 اور مظفرآباد میں 1 ڈگری سینٹی گریڈ درجہ حرارت ریکارڈ کیا گیا ہے۔