علامہ اقبال اوپن یونیورسٹی میں کورس ڈویلپمنٹ اور پروپوزل رائٹنگ پر 2 روزہ تربیتی ورکشاپ

اسلام آباد (اُردو پوائنٹ اخبارتازہ ترین - اے پی پی۔ 28 جنوری2026ء) علامہ اقبال اوپن یونیورسٹی کے سینٹر فار لائف لانگ لرننگ کے تحت متعارف کرائے جانے والے موجودہ اور مجوزہ کورسز کی تیاری اور بہتری کے لئے سینٹر فار لائف لانگ لرننگ کے زیرِ اہتمام جاپان انٹرنیشنل کوآپریشن ایجنسی (جائیکا) کے تعاون سے فیکلٹی ممبران اور ٹیکنیکل سٹاف کے لئے کورس ڈویلپمنٹ اور پروپوزل رائٹنگ کے موضوع پر 2 روزہ تربیتی ورکشاپ کا انعقاد کیا گیا۔

ورکشاپ کے افتتاحی اجلاس کی صدارت وائس چانسلر پروفیسر ڈاکٹر ناصر محمود نے کی جبکہ جائیکا کے ڈپٹی چیف ایڈوائزر عابد گل نے بطور مہمانِ اعزاز شرکت کی۔افتتاحی تقریب سے خطاب کرتے ہوئے وائس چانسلر نے کہا کہ سینٹر فار لائف لانگ لرننگ کے لئے تیار کیے جانے والے کورسز میں ریلیونس کو بنیادی اہمیت حاصل ہونی چاہئے۔

(جاری ہے)

انہوں نے کہا کہ تعلیمی اداروں کی ذمہ داری ہے کہ وہ ایسے کورسز ڈیزائن کریں جو نہ صرف موجودہ دور کے تقاضوں سے ہم آہنگ ہوں بلکہ مستقبل میں بھی موثر اور کارآمد ثابت ہوں۔

انہوں نے اس بات پر زور دیا کہ سینٹر فار لائف لانگ لرننگ کے کورسز کی تیاری کے دوران پائیدار ترقی کے اہداف (ایس ڈی جیز) کو مدنظر رکھنا وقت کی اہم ضرورت ہے تاکہ تعلیم معاشرتی اور معاشی ترقی میں عملی کردار ادا کر سکے۔وائس چانسلر نے کہا کہ موجودہ عالمی منظرنامے میں ہنر مند افرادی قوت بالخصوص آئی ٹی اور ڈیجیٹل سکلز سے لیس افراد کی مانگ میں تیزی سے اضافہ ہو رہا ہے۔

انہوں نے ورکشاپ کے شرکا کو ہدایت کی کہ وہ لائف لانگ لرننگ کے تحت ایسے کورسز تیار کریں جو معاشرتی ضروریات، مستقبل کے تقاضوں اور فنانشل وائیبلٹی کو مدنظر رکھتے ہوئے ڈیزائن کئے جائیں۔اس موقع پر جائیکا کے ڈپٹی چیف ایڈوائزر عابد گل نے علامہ اقبال اوپن یونیورسٹی میں سینٹر فار لائف لانگ لرننگ کے قیام کو ایک بروقت اور اہم اقدام قرار دیا۔

انہوں نے کہا کہ لائف لانگ لرننگ کا تصور افراد کو زندگی بھر سیکھنے کے مواقع فراہم کرتا ہے جو بدلتی ہوئی عالمی ضروریات کے تناظر میں ناگزیر ہو چکا ہے۔ انہوں نے امید ظاہر کی کہ یہ مرکز نہ صرف پاکستان بلکہ خطے میں بھی معیاری کورس ڈویلپمنٹ اور مؤثر پروپوزل رائٹنگ کے فروغ میں اہم کردار ادا کرے گا۔ورکشاپ کے دوران شرکا کو سینٹر فار لائف لانگ لرننگ کے کورسز کے لئے جدید کورس ڈیزائن، سیکھنے کے نتائج (Learning Outcomes)، مارکیٹ کی ضروریات سے ہم آہنگ نصاب کی تیاری اور موثر پروپوزل رائٹنگ سے متعلق عملی تربیت فراہم کی جا رہی ہے تاکہ فیکلٹی ممبران اور ٹیکنیکل سٹاف اپنی پیشہ ورانہ صلاحیتوں میں مزید بہتری لا سکیں۔