انسانیت کی خدمت کا اعتراف، ڈسٹرکٹ پولیس آفس مہمند میں تقریب

منگل 14 اپریل 2026 20:22

پشاور (اُردو پوائنٹ اخبارتازہ ترین - اے پی پی۔ 14 اپریل2026ء) ضلع مہمند میں سماجی و فلاحی خدمات کے اعتراف میں منگل کے روز ڈسٹرکٹ پولیس آفس میں ایک پروقار تقریب کا انعقاد کیا گیا، جس میں اصغر مہمند فاؤنڈیشن (سے ایم ایف) کے رضاکاروں کی خدمات کو سراہا گیا۔فاؤنڈیشن نے مستحق خاندانوں میں 1000 فوڈ پیکجز تقسیم کیے، پولیس شہداء کے لواحقین کو فوڈ پیکجز، عید کے کپڑے اور تحائف فراہم کیے، مختلف پولیس اسٹیشنوں میں قرآن مجید کے نسخے تقسیم کیے اور عید کے دن ڈیوٹی پر مامور پولیس اہلکاروں میں مٹھائی بھی تقسیم کی۔

(جاری ہے)

اس موقع پر ڈسٹرکٹ پولیس آفیسر مہمند رضا محمد نے چیئرمین اے ایم ایف ملک اصغر خان مہمند کو ان کی نمایاں خدمات کے اعتراف میں اعزازی شیلڈ اور لیٹر آف اپریسی ایشن پیش کیا، جبکہ دیگر رضاکاروں میں تعریفی سرٹیفکیٹس بھی تقسیم کیے گئے۔تقریب میں ایس پی انویسٹی گیشن زاہد عالم خان اور ڈی ایس پی ہیڈکوارٹرز لیاقت علی بھی موجود تھے، جنہوں نے رضاکاروں کی کارکردگی کو سراہا۔چیئرمین ملک اصغر خان مہمند نے پولیس کی جانب سے حوصلہ افزائی پر شکریہ ادا کرتے ہوئے اس عزم کا اظہار کیا کہ فاؤنڈیشن آئندہ بھی پولیس کے ساتھ مل کر فلاحی سرگرمیاں جاری رکھے گی۔