ایچ ای سی ، پی ایچ ڈی سکالرز کی چھ ماہ کی بین الاقوامی ریسرچ فیلوشپ کے لیے درخواستیں طلب کر لیں

جمعرات 16 اپریل 2026 17:57

اسلام آباد (اُردو پوائنٹ اخبارتازہ ترین - اے پی پی۔ 16 اپریل2026ء) ہائر ایجوکیشن کمیشن (ایچ ای سی)پاکستان نے انٹرنیشنل ریسرچ سپورٹ انیشیٹو پروگرام بیچ 59 کے تحت پی ایچ ڈی سکالرز کے لیے چھ ماہ کی بین الاقوامی ریسرچ فیلوشپ بارے درخواستیں طلب کر لیں۔ ایچ ای سی کے مطابق یہ پروگرام پاکستان اور آزاد جموں و کشمیر کے ان فل ٹائم پی ایچ ڈی طلبہ کے لیے کھلا ہے جو ہائر ایجوکیشن کمیشن سے منظور شدہ جامعات میں زیرِ تعلیم ہیں۔

درخواست دینے کے لیے امیدوار کا پی ایچ ڈی پروگرام میں داخلہ فال 2022 سے پہلے اور فال 2024 کے بعد نہ ہو۔ درخواست گزار کے پاس منظور شدہ تحقیقی موضوع اور سنوپسس یا مساوی فورم سے منظور شدہ ہونا لازمی ہے جبکہ کسی اعلیٰ درجہ کی غیر ملکی جامعہ سے قبولیت کا خط بھی درکار ہوگا۔

(جاری ہے)

یہ پروگرام خاص طور پر ایچ ای سی اسکالرشپ ہولڈرز کے لیے ہے جنہیں درخواست کے ساتھ این او سی جمع کرانا ہوگا۔

دلچسپی رکھنے والے امیدواروں کو ہدایت کی گئی ہے کہ وہ اپنی درخواستیں آن لائن پورٹل کے ذریعے جمع کرائیں،درخواست کے ساتھ تین ہزار روپے کی ناقابلِ واپسی پراسیسنگ فیس بھی جمع کرانا ہوگی۔ترجمان کے مطابق درخواستیں جمع کرانے کی آخری تاریخ 15 مئی 2026 مقرر کی گئی ہے، تفصیلات اور اہلیت کے معیار کے لیے ایچ ای سی کی ویب سائٹ سے رجوع کیا جا سکتا ہے۔ تعلیمی حلقوں نے اس اقدام کو خوش آئند قرار دیتے ہوئے کہا ہے کہ اس پروگرام سے پاکستانی طلبہ کو عالمی جامعات میں تحقیق کے مواقع میسر آئیں گے جس سے نہ صرف ان کی پیشہ ورانہ صلاحیتوں میں اضافہ ہوگا بلکہ ملک میں تحقیق کے معیار کو بھی فروغ ملے گا۔\932