صحافت اور سیاست لازم و ملزوم ہیں،وزیراعظم آزادکشمیر

ذمہ دار صحافت کسی بھی معاشرے کی ترقی اور جمہوریت کے استحکام کے لیے ناگزیر ہے،فیصل ممتازراٹھور

ہفتہ 18 اپریل 2026 18:10

اسلام آباد (اُردو پوائنٹ اخبارتازہ ترین - این این آئی۔ 18 اپریل2026ء) آزاد جموں و کشمیر کے وزیراعظم فیصل ممتاز راٹھور نے کہا ہے کہ صحافت اور سیاست لازم و ملزوم ہیں،صحافت عوام کے مسائل کو اجاگر کرتی ہے جبکہ سیاست ان مسائل کو حل کرنے کی ذمہ داری ادا کرتی ہے، اخبارات کو درپیش حقیقی مسائل کے حل کے لیے حکومت اپنی تمام توانائیاں بروئے کار لائے گی،انہوں نے سردار زاہد تبسم کو 24 سالہ صحافتی سفر مکمل کرنے پر مبارکباد دیتے ہوئے کہا کہ اخبار اب اپنی جوانی کے جوبن میں داخل ہو چکا ہے اور امید ہے کہ یہ اسی جذبے کے ساتھ تحریکِ آزادی کشمیر کو اجاگر کرتا رہے گا جس طرح ہمارے اخبارات یہ اہم قومی فریضہ انجام دے رہے ہیں۔

وزیراعظم نے ان خیالات کا اظہار روزنامہ کشمیر ایکسپریس کی 24ویں سالگرہ کے موقع پر کیک کاٹنے کے بعد صحافیوں سے غیر رسمی گفتگو کرتے ہوئے کیا۔

(جاری ہے)

اس موقع پر چیف ایڈیٹر کشمیر ایکسپریس و چیف ایگزیکٹو کشمیر ایکسپریس ڈیجیٹل سردار زاہد تبسم، ایڈیٹر کشمیر ایکسپریس شمیم اشرف،وزیراعظم کے پولیٹیکل اسسٹنٹ سید عزادار حسین کاظمی، مشیر حکومت زاہد مغل،پریس سیکرٹری آصف علی راٹھور،وزیراعظم کے کوآرڈینیٹر سید آفتاب گیلانی، معروف بزنس مین اشفاق مغل برطانیہ،احمد مغل،زاہد مغل،وقاص مغل،یوسف زاہد،، سمیت سینئر صحافیوں اور کشمیر جرنلسٹس فورم کے ممبران اور روزنامے کی ٹیم موجود تھی۔

وزیراعظم نے کہا کہ آزاد کشمیر میں صحافت نے ہمیشہ عوامی مسائل کو اجاگر کرنے اور تحریک آزادی کشمیر کی آواز کو دنیا تک پہنچانے میں اہم کردار ادا کیا ہے۔ انہوں نے کہا کہ ذمہ دار صحافت کسی بھی معاشرے کی ترقی اور جمہوریت کے استحکام کے لیے ناگزیر ہے۔انہوں نے کہا کہ حکومت آزاد کشمیر صحافیوں کے مسائل کے حل، میڈیا کے فروغ اور اطلاعات تک رسائی کو بہتر بنانے کے لیے اقدامات کر رہی ہے۔

صحافی معاشرے کی آنکھ اور کان ہوتے ہیں اور ان کی پیشہ ورانہ خدمات کو قدر کی نگاہ سے دیکھا جاتا ہے۔وزیراعظم نے مزید کہا کہ کشمیر ایکسپریس نے گزشتہ 24 برسوں میں نہ صرف آزاد کشمیر بلکہ مقبوضہ کشمیر کے عوام کی آواز کو بھی موثر انداز میں اجاگر کیا ہے۔ ایسے اخبارات اور صحافی دراصل تحریکِ آزادی کشمیر کے سفیر کا کردار ادا کر رہے ہیں۔انہوں نے اس امید کا اظہار کیا کہ کشمیر ایکسپریس آئندہ بھی قومی، ملی اور کشمیر کاز کے حوالے سے اپنا مثبت اور موثر کردار جاری رکھے گا اور صحافت کے اعلیٰ اصولوں کو برقرار رکھتے ہوئے عوام کی درست رہنمائی کرتا رہے گا۔