صوبائی وزیر سوشل ویلفیئر و بیت المال سہیل شوکت بٹ کی زیر صدارت اہم اجلاس

جمعرات 23 اپریل 2026 17:28

لاہور(اُردو پوائنٹ اخبارتازہ ترین - این این آئی۔ 23 اپریل2026ء) وزیراعلیٰ پنجاب مریم نواز کے ویژن کے تحت صوبے میں عوامی فلاحی منصوبوں پر تیزی سے عملدرآمد جاری ہے۔ اس سلسلے میں صوبائی وزیر سوشل ویلفیئر و بیت المال پنجاب سہیل شوکت بٹ کی زیر صدارت ایک اہم اجلاس منعقد ہوا، جس میں سیکرٹری سوشل ویلفیئر سائرہ عمر اور ڈی جی سوشل ویلفیئر ڈاکٹر شہنشاہ فیصل عظیم نے شرکت کی۔

اجلاس کے دوران محکمہ سوشل ویلفیئر و بیت المال کے جاری منصوبوں، ادارہ جاتی کارکردگی میں بہتری، اور عوامی فلاح و بہبود کے اقدامات کو مزید مؤثر بنانے کے حوالے سے تفصیلی جائزہ لیا گیا۔ اس موقع پر جاری پروگرامز کے دائرہ کار کو بڑھا کر زیادہ سے زیادہ مستحق افراد تک رسائی یقینی بنانے کی ہدایات جاری کی گئیں۔

(جاری ہے)

صوبائی وزیر سہیل شوکت بٹ نے کہا کہ مستحق اور کمزور طبقات کو ریلیف کی فراہمی حکومت کی اولین ترجیح ہے۔

انہوں نے بتایا کہ اب تک تقریباً ایک لاکھ افراد باہم معذوری کو ہمت کارڈ جاری کیے جا چکے ہیں۔انہوں نے مزید کہا کہ ’’دھی رانی‘‘پروگرام کا ہدف رمضان المبارک سے قبل ہی مکمل کر لیا گیا تھا، اور اب تک مجموعی طور پر 8 ہزار مستحق بیٹیاں اپنے گھروں کی ہو چکی ہیں۔صوبائی وزیر نے بتایا کہ 17 ہزار اسسٹیو ڈیوائسز اور پروستھیٹکس مستحق افراد میں تقسیم کی جا چکی ہیں، جبکہ مزید اقدامات کے ذریعے ان پروگرامز کو وسعت دی جا رہی ہے۔انہوں نے اس عزم کا اعادہ کیا کہ وزیراعلیٰ پنجاب مریم نواز کی قیادت میں افراد باہم معذوری اور مستحق طبقات کے لیے فلاحی پروگرامز کو مزید مؤثر بنایا جائے گا، اور ادارہ جاتی کارکردگی کو بہتر بنا کر عوامی خدمت کے معیار کو مزید بلند کیا جائے گا۔