Live Updates

سعودی عرب کے ساتھ غذائی تجارت کا جائزہ لینے کے لیے پاکستانی وفد سیف الرحمان کی قیادت میں روانہ

اتوار 3 مئی 2026 13:09

لاہور (اُردو پوائنٹ اخبارتازہ ترین - اے پی پی۔ 03 مئی2026ء) وفاقی ٹیکس محتسب کے کوآرڈینیٹر سیف الرحمان کی قیادت میں اعلی سطحی پاکستانی غذائی وفد اتوار کے روز سعودی عرب روانہ ہو گیا،جہاں وہ مشرقِ وسطی میں جاری بحران کے تناظر میں مملکت کی غذائی ضروریات کا جائزہ لے گا۔روانگی سے قبل گفتگو کرتے ہوئے سیف الرحمان نے کہا کہ یہ دورہ ایسے نازک وقت میں ہو رہا ہے جب امریکا، اسرائیل اور ایران تنازع کے باعث خطے کی سپلائی چین شدید متاثر ہوئی ہے،خصوصا بحری تجارتی راستوں اور توانائی کی ترسیل میں رکاوٹیں پیدا ہوئی ہیں۔

انہوں نے کہا کہ اس دورے سے پاکستان اور سعودی عرب کے درمیان معاشی تعلقات مزید مضبوط ہوں گے جبکہ پاکستان خطے میں غذائی تحفظ کے لیے ایک قابلِ اعتماد شراکت دار کے طور پر اپنی ابھرتی ہوئی حیثیت کو مزید مستحکم کرے گا۔

(جاری ہے)

انہوں نے بتایا کہ وفد سعودی حکام سے ملاقاتیں کرے گا،فوری اور طویل المدتی غذائی ضروریات کا جائزہ لے گا اور خوراک کی برآمدات سمیت دوطرفہ تعاون کے نئے امکانات تلاش کرے گا۔

یہ اقدام پاکستان کی اس وسیع تر پالیسی کا حصہ ہے جس کے تحت دوست ممالک کو بحران کے وقت تعاون فراہم کرنے کے ساتھ ساتھ ملکی زرعی برآمدات کو بھی فروغ دیا جا رہا ہے۔سیف الرحمان نے کہا کہ پاکستان اس سے قبل بھی خلیجی ممالک کو اضافی غذائی اجناس برآمد کرنے کے منصوبوں کا اعلان کر چکا ہے تاکہ جنگی صورتحال سے پیدا ہونے والی قلت پر قابو پایا جا سکے۔

انہوں نے مزید کہا کہ طویل تنازع کے باعث عالمی غذائی تحفظ متاثر ہونا شروع ہو گیا ہے اور خدشہ ظاہر کیا جا رہا ہے کہ توانائی اور کھاد کی بڑھتی قیمتوں کے باعث لاکھوں افراد غذائی قلت کا شکار ہو سکتے ہیں۔خلیجی ممالک بالخصوص سعودی عرب اب مسلسل غذائی فراہمی کے لیے قابلِ اعتماد شراکت داروں کی تلاش میں ہیں اور پاکستان اپنی زرعی پیداوار اور جغرافیائی اہمیت کے باعث اس ضرورت کو پورا کرنے کی بہترین پوزیشن میں ہے۔