ایکسپورٹرز کی سہولت کیلئے درآمدی مال کے استعمال کی مدت 9 ماہ سے بڑھا کر 18 ماہ کر دی گئی ہے،چیف کلیکٹر کسٹمز اپریزمینٹ

بدھ 6 مئی 2026 16:49

فیصل آباد (اُردو پوائنٹ اخبارتازہ ترین - اے پی پی۔ 06 مئی2026ء) ایکسپورٹ فیسلی ٹیشن سکیم کے تحت نئے جاری ہونے والے ایس آر او میں ایکسپورٹرز کی سہولت کیلئے درآمدی مال کے استعمال کی مدت 9 ماہ سے بڑھا کر 18 ماہ کر دی گئی ہے۔ یہ بات چیف کلیکٹر کسٹمز اپریزمینٹ پنجاب نوید الٰہی نے پاکستان ہوزری مینوفیکچررز اینڈ ایکسپورٹرز ایسوسی ایشن میں منعقدہ ایک خصوصی آگاہی سیشن سے خطاب کرتے ہوئے کہی۔

انہوں نے کہا کہ یہ ایس آر او 19 مارچ سے نافذ العمل ہو چکا ہے اور جن درآمد کنندگان نے اس سکیم کے تحت پہلے ہی مال درآمد کر رکھا ہے، انہیں خودکار طور پر اس توسیع کا فائدہ حاصل ہو جائے گا۔ انہوں نے مزید بتایا کہ ایکسپورٹ فیسلی ٹیشن سکیم کے تحت درآمدی مال کی برآمد کی صورت میں ریئل ٹائم بنیادوں پر اس کی ایڈجسٹمنٹ ہو جائے گی۔

(جاری ہے)

انہوں نے یہ بھی واضح کیا کہ اگر 18 ماہ سے زائد توسیع درکار ہو تو اس کیلئے بورڈ سے پیشگی منظوری لینا ہوگی۔

اس موقع پر کلیکٹر کسٹمز اپریزمینٹ فیصل آباد، ڈاکٹر رضوان بشارت نے کہا کہ ایکسپورٹ فیسلی ٹیشن سکیم کے تحت فیصل آباد ڈرائی پورٹ پر وہی سہولتیں فراہم کی جا رہی ہیں جو کراچی میں دستیاب ہیں، لہٰذا فیصل آباد کے برآمد کنندگان کو بھی اس سہولت سے بھرپور فائدہ اٹھانا چاہیے۔ انہوں نے مزید بتایا کہ کسٹم ہاؤس فیصل آباد میں کیمروں کی تنصیب بھی مکمل کر لی گئی ہے جس سے سکیورٹی سے متعلق مسائل بھی حل ہوں گے۔

اس سے قبل پاکستان ہوزری مینوفیکچررز اینڈ ایکسپورٹرز ایسوسی ایشن کے سینئر وائس چیئرمین احمد افضل اعوان نے معزز مہمانوں کا خیرمقدم کرتے ہوئے کہا کہ اس آگاہی سیشن کا مقصد ممبران کو ایکسپورٹ فیسلی ٹیشن سکیم کے بارے میں مکمل معلومات فراہم کرنا اور حال ہی میں ایس آر او میں ہونے والی تبدیلیوں سے آگاہ کرنا ہے، تاکہ وہ اس سے زیادہ سے زیادہ فائدہ اٹھا سکیں۔

انہوں نے اس امید کا اظہار کیا کہ یہ سیشن ایکسپورٹرز کو سکیم میں ہونے والی ترامیم کو بہتر طور پر سمجھنے اور ان سے بھرپور استفادہ کرنے میں مدد دے گا۔آخر میں احمد افضل اعوان سینئر وائس چیئرمین نے چیف کلکٹر کسٹم نوید الٰہی اور حافظ راشد محمود ممبر ایگزیکٹو کمیٹی نے کلکٹر کسٹم ڈاکٹر رضوان بشارت کو پی ایچ ایم اے کی اعزازی شیلڈ پیش کی۔