اٹک، پولیس کی فوری کارروائی، 60 لاکھ روپے مالیت کے طلائی زیورات چوری کرنے والے ملزمان گرفتار

جمعرات 7 مئی 2026 16:32

اٹک (اُردو پوائنٹ اخبارتازہ ترین - اے پی پی۔ 07 مئی2026ء) تھانہ پنڈیگھیب پولیس نے طلائی زیورات چوری کی واردات میں ملوث دو ملزمان کو انتہائی قلیل وقت میں گرفتار کر کے تقریباً 60 لاکھ روپے مالیت کے مسروقہ زیورات برآمد کر لیے۔تفصیلات کے مطابق 5 مئی 2026 کو عبدالوقاص سکنہ مکیال تحصیل پنڈیگھیب نے تھانہ پنڈیگھیب پولیس کو درخواست دی کہ وہ اپنے بھائی کو ڈھلیاں چوک چھوڑنے گیا تھا، واپسی پر گھر پہنچا تو ہال کا تالا غائب تھا جبکہ کمرے میں موجود صندوق سے طلائی زیورات، جن میں چین، ہار سیٹ، مالا سیٹ، جھمکے، کانٹے اور انگوٹھیاں شامل تھیں، چوری ہو چکے تھے۔

درخواست موصول ہونے پر پولیس نے فوری مقدمہ درج کر کے تفتیش شروع کی۔ ایس ایچ او تھانہ پنڈیگھیب ملک منور نے اپنی ٹیم کے ہمراہ جدید ٹیکنالوجی، ہیومن انٹیلی جنس اور پیشہ ورانہ مہارت کی مدد سے کارروائی کرتے ہوئے ملزمان عبید اللہ ولد عابد محمود اور زوار حیدر ولد الطاف سکنائے مکیال کو ٹریس کر کے گرفتار کر لیا۔

(جاری ہے)

پولیس کے مطابق گرفتار ملزمان مدعی کے قریبی دوست نکلے، جن کے قبضہ سے دورانِ تفتیش تقریباً 60 لاکھ روپے مالیت کے مسروقہ طلائی زیورات برآمد کر لیے گئے۔

اس موقع پر ڈسٹرکٹ پولیس آفیسر اٹک سردار موارہن خان نے پولیس ٹیم کی کارکردگی کو سراہتے ہوئے کہا کہ اٹک پولیس شہریوں کے جان و مال کے تحفظ کے لیے تمام وسائل بروئے کار لا رہی ہے۔ انہوں نے ہدایت کی کہ ملزمان کے خلاف ٹھوس شواہد کی بنیاد پر چالان مرتب کر کے انہیں قرار واقعی سزا دلوائی جائے۔\378