مودی نے پہلگام میں ایک ناکام فالس فلیگ ڈرامہ رچایا‘ دشمن کو ہر محاذ پر شرمندگی کا سامنا کرنا پڑا،طارق فضل چوہدری

جمعرات 7 مئی 2026 17:46

اسلام آباد(اُردو پوائنٹ اخبارتازہ ترین - آن لائن۔ 07 مئی2026ء) وفاقی وزیر پارلیمانی امور ڈاکٹر طارق فضل چوہدری نے کہا ہے کہ مودی نے پہلگام میں ایک ناکام فالس فلیگ ڈرامہ رچایا‘ دشمن کو ہر محاذ پر شرمندگی کا سامنا کرنا پڑا،پاکستان امن چاہتا ہے، لیکن اگر دوبارہ جارحیت مسلط کی گئی تو جواب پہلے سے زیادہ سخت ہوگا۔ ایکس پر مودی کو جواب میں وفاقی وزیر پارلیمانی امور ڈاکٹر طارق فضل چوہدری نے کہا کہ مودی نے پہلگام میں ایک ناکام فالس فلیگ ڈرامہ رچایا تاکہ پاکستان کے خلاف بیانیہ بنایا جا سکے، جب پاکستان نے ٹھوس ثبوت اور غیر جانبدار بین الاقوامی تحقیقات کا مطالبہ کیا تو بھارت پیچھے ہٹ گیا۔

طارق فضل چوہدری نے کہا کہ بھارت کا نام نہاد آپریشن سندور کو پاکستان کے آپریشن بنیان المرصوص نے مکمل طور پر ناکام بنایا، پاکستان کی مسلح افواج نے درست حکمتِ عملی اور بھرپور طاقت کے ساتھ جواب دیتے ہوئے بھارت کے 6 جنگی طیارے مار گرائے۔

(جاری ہے)

طارق فضل چوہدری نے کہا کہ دشمن کو ہر محاذ پر شرمندگی کا سامنا کرنا پڑا، دنیا نے دیکھا کہ بھارت صرف پروپیگنڈے پر انحصار کر رہا تھا اور پاکستان نے عملی قوت کا مظاہرہ کیا، بھارت سوشل میڈیا پر جعلی بیانیے اور بڑھکوں سے حقائق کو نہیں چھپا سکتا۔

وفاقی وزیر نے کہاکہ سچائی اب دنیا کے سامنے آ چکی ہے اور تاریخ یاد رکھے گی کہ کون ثابت قدم رہا اور کون میدان سے بھاگا، پاکستان امن چاہتا ہے، لیکن اگر دوبارہ جارحیت مسلط کی گئی تو جواب پہلے سے زیادہ سخت ہوگا۔ طارق فضل چوہدری نے واضح کیا کہ بھارت کو دھمکیاں دینے یا دوبارہ کوئی ڈرامہ رچانے سے پہلے یاد رکھنا چاہیے کہ پاکستان اپنے دفاع کیلئے ہمہ وقت تیار ہے۔