اٹک ، پولیس نے طلائی زیورات چوری کرنے والے ملزمان کو گرفتار کر کے مالِ مسروقہ طلائی زیورات مالیتی 60 لاکھ روپے برآمد کر لئے

جمعرات 7 مئی 2026 17:32

اٹک (اُردو پوائنٹ اخبارتازہ ترین - اے پی پی۔ 07 مئی2026ء) پنڈی گھیب پولیس نے طلائی زیورات چوری کرنے والے ملزمان کو انتہائی قلیل وقت میں گرفتار کر کے مالِ مسروقہ طلائی زیورات مالیتی 60 لاکھ روپے برآمد کر لئے ۔

(جاری ہے)

تفصیلات کے مطابق تھانہ پنڈیگھیب پولیس کو مورخہ 05.05.2026 کو مسمی عبدالوقاص سکنہ مکیال تحصیل پنڈیگھیب ضلع اٹک کی جانب سے درخواست موصول ہوئی کہ چند روز قبل وہ اپنے بھائی کو ڈھلیاں چوک چھوڑنے گیا، واپسی پر گھر پہنچا تو دیکھا کہ حال کا تالا موجود نہ تھا جبکہ پڑتال کرنے پر کمرے میں موجود صندوق سے طلائی زیورات جن میں ایک عدد چین، ایک ہار سیٹ، ایک عدد مالا سیٹ، دو جھمکے، دو کانٹے اور دو عدد انگوٹھیاں، کل مالیتی تقریباً 60 لاکھ روپے غائب تھے، درخواست موصول ہونے پر تھانہ پنڈیگھیب پولیس نے فوری مقدمہ درج کر کے تفتیش کا آغاز کیا، ایس ایچ او تھانہ پنڈیگھیب ملک منور نے اپنی ٹیم کے ہمراہ پیشہ ورانہ مہارت، جدید ٹیکنالوجی اور ہیومن انٹیلی جنس کی مدد سے کارروائی کرتے ہوئے واردات میں ملوث ملزمان عبید اللہ ولد عابد محمود سکنہ مکیال تحصیل پنڈیگھیب اور زوار حیدر ولد الطاف سکنہ مکیال تحصیل پنڈیگھیب کو انتہائی قلیل وقت میں ٹریس کر کے گرفتار کر لیا، گرفتار ملزمان مدعی کے قریبی دوست نکلے جو چوری کی واردات میں ملوث تھے، دورانِ انٹیروگیشن ملزمان کے قبضہ سے مالِ مسروقہ طلائی زیورات مالیتی تقریباً 60 لاکھ روپے بھی برآمد کر لیے گئے۔

\378