اسلام آباد پولیس کا جرائم پیشہ عناصر کے خلاف موثر کریک ڈاؤن جاری

48 گھنٹوں میں 36 جرائم پیشہ عناصر گرفتار، منشیات اور اسلحہ برآمد

ہفتہ 9 مئی 2026 20:10

اسلام آباد(اُردو پوائنٹ اخبارتازہ ترین - این این آئی۔ 09 مئی2026ء) اسلام آباد پولیس نے جرائم کے انسداد اور جرائم پیشہ عناصر کی گرفتاری کیلئے وفاقی دارالحکومت کے مختلف علاقوں میں موثر کریک ڈاؤن کرتے ہوئے گزشتہ 48 گھنٹوں کے دوران سنگین جرائم میں ملوث 16 مجرمان اشتہاریوں سمیت 36 جرائم پیشہ عناصر کو گرفتار کر لیا۔ کارروائیوں کے دوران ملزمان کے قبضے سے بھاری مقدار میں منشیات اور غیر قانونی اسلحہ بھی برآمد کیا گیا۔

تفصیلات کے مطابق انسپکٹر جنرل آف پولیس اسلام آباد سید علی ناصر رضوی کے خصوصی احکامات کی روشنی میں اسلام آباد پولیس کی جانب سے شہریوں کے جان و مال کے تحفظ اور جرائم پیشہ عناصر کی سرکوبی کیلئے مختلف کارروائیاں عمل میں لائی گئیں۔ اس دوران منشیات فروشی اور غیر قانونی اسلحہ رکھنے میں ملوث 20 ملزمان کو گرفتار کیا گیا۔

(جاری ہے)

پولیس نے گرفتار ملزمان کے قبضے سے 2 ہزار 740 گرام چرس، ایک ہزار 451 گرام آئس، 570 گرام ہیروئن، 208 بوتلیں شراب، دو رائفلیں، دو کلاشنکوف اور مختلف بور کے پانچ پستول معہ ایمونیشن برآمد کر لئے۔

ملزمان کے خلاف مقدمات درج کر کے مزید تفتیش شروع کر دی گئی ہے۔اسی طرح مجرمان اشتہاریوں اور عدالتی مفروران کی گرفتاری کیلئے چلائی جانے والی خصوصی مہم کے دوران 16 اشتہاری مجرمان کو بھی گرفتار کیا گیا۔ایس ایس پی آپریشنز اسلام آباد قاضی علی رضا نے کہا کہ اسلام آباد پولیس شہریوں کے جان و مال کے تحفظ کیلئے ہمہ وقت متحرک ہے اور کسی بھی شرپسند یا جرائم پیشہ عنصر کو شہریوں کے امن میں خلل ڈالنے کی اجازت نہیں دی جائے گی۔ انہوں نے شہریوں سے اپیل کی کہ کسی بھی مشکوک سرگرمی کے بارے میں فوری طور پر متعلقہ تھانے یا ایمرجنسی ہیلپ لائن پکار-15 پر اطلاع دیں تاکہ پولیس اور عوام کے تعاون سے شہر کو جرائم سے پاک بنایا جا سکے۔