ڈی آئی جی اسلام آباد محمد جواد طارق کا پولیس افسران کیلئے اردل روم کا انعقاد

پولیس افسران کے مسائل کے فوری حل اور ویلفیئر اقدامات پر زور

ہفتہ 9 مئی 2026 20:10

اسلام آباد(اُردو پوائنٹ اخبارتازہ ترین - این این آئی۔ 09 مئی2026ء) ڈی آئی جی اسلام آباد محمد جواد طارق نے پولیس افسران کو درپیش محکمانہ اور ذاتی نوعیت کے مسائل کے بروقت حل اور ان کی دادرسی کیلئے اردل روم کا انعقاد کیا جس میں آپریشنز ڈویڑن کے مختلف پولیس افسران نے شرکت کی۔تفصیلات کے مطابق انسپکٹر جنرل آف پولیس اسلام آباد سید علی ناصر رضوی کے خصوصی احکامات کی روشنی میں منعقدہ اردل روم میں پولیس افسران نے اپنے سرکاری اور ذاتی نوعیت کے مسائل ڈی آئی جی اسلام آباد کے سامنے پیش کیے۔

اس موقع پر محمد جواد طارق نے سنگین نوعیت کے معاملات پر سینئر پولیس افسران کو ازسرنو انکوائریاں مکمل کرنے کی ہدایت جاری کی جبکہ دیگر مسائل کو ترجیحی بنیادوں پر حل کرنے کے احکامات بھی دیے۔

(جاری ہے)

ڈی آئی جی اسلام آباد نے کہا کہ پولیس ملازمین کی ویلفیئر کیلئے متعدد اقدامات کیے جا رہے ہیں جن میں رہائش، بہترین طبی سہولیات اور تعلیم کے معیار کو بہتر بنانا شامل ہے۔

انہوں نے افسران سے خطاب کرتے ہوئے کہا کہ ان کے دفتر کے دروازے ہر وقت پولیس افسران کیلئے کھلے ہیں اور تمام افسران نے مل کر شہر کی بہتری اور عوام کے تحفظ کیلئے اپنا کردار ادا کرنا ہے۔انہوں نے مزید کہا کہ اردل روم کے انعقاد کا مقصد پولیس افسران کی فلاح و بہبود، ان کے ذاتی و سرکاری مسائل کو ترجیحی بنیادوں پر حل کرنا اور ان کا مورال بلند کرنا ہے تاکہ وہ مزید جذبے کے ساتھ اپنے فرائض انجام دے سکیں۔