Live Updates

مصری صدر کی فرانسیسی ہم منصب سے ملاقات ،خطے کی موجودہ صورتحال و غزہ بارے تبادلہ خیال

اتوار 10 مئی 2026 08:32

قاہرہ (اُردو پوائنٹ اخبارتازہ ترین - اے پی پی۔ 10 مئی2026ء) مصر کے صدر عبدالفتاح السیسی اور فرانسیسی ہم منصب ایمانوئل میکرون کے درمیان قاہرہ میں اہم ملاقات ہوئی، جس میں خطے کی موجودہ صورتحال، ایران اور امریکا کے درمیان بڑھتی کشیدگی، اور غزہ میں انسانی بحران پر تبادلہ خیال کیا گیا۔شنہوا کے مطابق مصری ایوانِ صدر کے مطابق یہ ملاقات قاہرہ کے شمال میں واقع نیو برگ العرب سٹی میں فرانسیسی زبان کی بین الاقوامی جامعہ “سینگور یونیورسٹی” کے نئے ہیڈکوارٹر کی افتتاحی تقریب کے موقع پر ہوئی۔

ملاقات کے دوران صدر السیسی نے خطے میں جاری کشیدگی کو کم کرنے کے لیے مصر کی سفارتی کوششوں پر روشنی ڈالی اور زور دیا کہ مزید عدم استحکام سے پورے خطے کو بچانا ضروری ہے، کیونکہ اس کے اثرات علاقائی و عالمی سلامتی، تجارتی سرگرمیوں، سپلائی چین اور ٹرانسپورٹ پر مرتب ہوسکتے ہیں۔

(جاری ہے)

مصری صدر نے عرب ممالک کی سلامتی اور استحکام کے لیے مصر کے غیر متزلزل مؤقف کا اعادہ کرتے ہوئے کسی بھی ملک کی خودمختاری یا قدرتی وسائل میں مداخلت کو مسترد کیا۔

فرانسیسی صدر ایمانوئل میکرون نے امید ظاہر کی کہ مشرقِ وسطیٰ میں جاری بحرانوں کا جلد پرامن حل نکالا جائے گا تاکہ خطے میں امن اور استحکام بحال ہوسکے۔دونوں رہنماؤں نے لبنان کی صورتحال پر بھی گفتگو کی اور اس بات پر اتفاق کیا کہ ملک میں امن و استحکام برقرار رکھنا انتہائی ضروری ہے۔ ملاقات میں بحیرہ روم سے ملحق ممالک کے درمیان تعاون بڑھانے کے امکانات پر بھی غور کیا گیا۔