نیشنل ہائی ویز اینڈ موٹروے پولیس ٹریننگ کالج شیخوپورہ میں 13ویں بنیادی بھرتی کورس مکمل کرنیوالے افسران کی پاسنگ آؤٹ پریڈ کی پروقار تقریب

شاہد نذیر چودھری پیر 11 مئی 2026 14:38

شیخو پوررہ(اُردو پوائنٹ اخبارتازہ ترین۔ 11 مئی2026ء) نیشنل ہائی ویز اینڈ موٹروےپولیس ٹریننگ کالج شیخوپورہ میں تیرہویں بنیادی بھرتی کورس مکمل کرنے والے افسران کی پاسنگ آؤٹ پریڈ کی پروقار تقریب منعقد ہوئی۔ تقریب کے مہمانِ خصوصی انسپکٹر جنرل سلطان احمد چودہری تھے، جنہوں نے پریڈ کا معائنہ کیا اور چاک و چوبند دستوں سے سلامی لی۔ اس موقع پر تربیت مکمل کرنے والے افسران نے اپنی نئی ذمہ داریوں کا حلف بھی اٹھایا۔

تربیت مکمل کرنے والوں میں تین سو نوے افسران شامل تھے، جن میں انتالیس خواتین افسران بھی شامل تھیں۔ تقریب سے خطاب کرتے ہوئے آئی جی سلطان احمد چودہری نے کہا کہ شاہراہوں کو محفوظ بنانا موٹروے پولیس کی بنیادی ذمہ داری ہے۔ انہوں نے نئے افسران پر زور دیا کہ وہ ایمانداری، خوش اخلاقی اور عوامی خدمت کے جذبے کے ساتھ اپنے فرائض انجام دیں۔

(جاری ہے)

انہوں نے کہا کہ موٹروے پولیس نے دیانتداری اور بہترین کردار سے عوام کا اعتماد حاصل کیا ہے۔
آئی جی موٹروےپولیس سلطان احمد چودہری نے کہا کہ موٹروے پولیس نے ایمانداری اور خوش اخلاقی سے عوام کا اعتماد حاصل کیا۔قانون سب کے لیے برابر اور ہماری کامیاب کی بنیاد ہے۔شہداء ہیرو اور عظیم ہیں یہ وہ شاندار وطن کے شاندار لوگ ہیں جو قوم کے مستقبل کے لیے اپنا آج قربان کرتے ہیں
کمانڈنٹ ٹریننگ کالج ڈی آئی جی مسرور عالم کولاچی نے اپنے خطاب میں کہا کہ تربیتی ادارے میں پیشہ ورانہ مہارت کے ساتھ کردار سازی پر بھی خصوصی توجہ دی گئی۔

تقریب کے دوران نمایاں کارکردگی دکھانے والے افسران میں اعزازات تقسیم کیے گئے۔ ریحان اللہ نے مجموعی طور پر نمایاں کارکردگی کے ساتھ دو اعزازات حاصل کیے۔ مینال رضا نے تعلیمی میدان میں نمایاں کارکردگی، عبدل واسق نے بہترین ڈرائیونگ جبکہ مہدی عین اللہ نے بہترین نشانہ بازی کا اعزاز حاصل کیا۔
بعد ازاں سلطان احمد چودہری اور مسرور عالم کولاچی نے شہداء کی یادگار پر حاضری دی، پھول رکھے اور شہداء کے درجات کی بلندی کے لیے دعا کی۔