یونیک گروپ آف انسٹی ٹیوشنز کے زیر اہتمام سالانہ انٹر سکول قرآت مقابلوں کاانعقاد

لاہور(اُردو پوائنٹ اخبارتازہ ترین۔ 11 مئی2026ء)  یونیک گروپ آف انسٹی ٹیوشنز کے زیر اہتمام یونیک گروپ کے ڈاکٹر نثار احمد رانا آڈیٹوریم میں سالانہ انٹر سکول قرآت مقابلے کاانعقاد کیا گیا جس کی صدارت چیئرمین یونیک گروپ پروفیسر عبدالمنان خرم نے کی جبکہ تقریب کے مہمان خصوصی چیئرمین متحدہ علما بورڈ ڈاکٹر مفتی انتخاب احمد نوری تھے۔ تقریب کے مہمانان گرامی میں معروف سیرت سکالر ڈاکٹر طارق شریف زادہ، وائس چانسلر سیالکوٹ یونیورسٹی پروفیسرڈاکٹر خلیق الرحمن اور معروف موٹیو یشنل سپیکر ڈاکٹر نوشابہ مراد تھیں۔

مقابلے میں یونیک گروپ کے 80سے زائد کیمپسز کے طلبا نے شرکت کی۔اس موقع پر خطاب کرتے ہوئے چیئرمین یونیک گروپ پروفیسر عبدالمنان خرم نے کہا کہ قرآت مقابلوں کے انعقاد کا مقصد طلبا میں خوش الہانی کو فروغ دینا ہے۔

(جاری ہے)

انہوں نے کہا کہ قرآن کو پڑھنا اور اس پر عمل پیرا ہونے سے ہی ہم نوجوانوں کو کامیاب مستقبل کا ضامن قرار دے سکتے ہیں۔ انہوں نے مذیدکہا کہ طلبا میں قرآت کے مقابلے بچوں میں قرآن سے الفت پیدا کرتے ہیں۔

اس موقع پر خطاب کرتے ہوئے چیئرمین متحدہ علما بورڈ ڈاکٹر مفتی انتخاب احمد نوری نے کہا کہ قرآن کی اہمیت اور فضیلت تو خود خدا نے بیان کی ہے اور اس پر عمل پیرا ہونے سے ہی کامیابی کا حصول ممکن ہے۔ انہوں نے کہا کہ آج ہم دور ِ جدید میں قرآن پاک سے دور ہوتے جا رہے ہیں جس کے نتیجہ میں ہم اللہ تعالی کی رحمتوں سے بھی محروم ہورہے ہیں۔ انہوں نے کہا کہ ہمیں قرآن سے لگاؤ کو بڑھانا ہوگا اور یونیک گروپ اس ضمن میں اہم کردار ادا کرتے ہوئے طلبا میں قرآن کی محبت اور اس کو خوش الہانی سے پڑھنے کے حوالے سے اہم کردار ادا کر رہاہے۔

تقریب سے ریکٹریونیک گروپ پروفیسر امجد علی خان، معروف سیرت سکالر ڈاکٹر طارق شریف زادہ، وائس چانسلر سیالکوٹ یونیورسٹی پروفیسرڈاکٹر خلیق الرحمن اور معروف موٹیو یشنل سپیکر ڈاکٹر نوشابہ مرادنے بھی خطاب کیا۔انٹر سکول قرات مقابلوں میں کامیاب ہونے والے جونئیر کیٹگری میں پہلی پوزیشن مرغزار کیمپس کے عبدالرحمان ساجد، دوسری پوزیشن یونیک سمن آباد کیمپس کی حریم زاہرہ اور تیسری پوزیشن یونیک رچنا بلاک کیمپس کے محمدنے حاصل کی۔

مڈل کیٹگری میں یونیک مناواں کیمپس کی دعا زاہداور اڈا پلاٹ کیمپس کی روبیسہ نے پہلی پہلی، یونیک شادباغ کیمپس کی منال شیراز دوسری اوریونیک ای ایم ای کیمپس کی حریم لیاقت نے تیسری پوزیشن حاصل کی۔ سینئر کیٹگری میں یونیک ایفل ٹاورکے ابوبکر خالد نے پہلی، لوئر مال کیمپس کی علیزہ زاہرہنے دوسر ی اور تیسری پوزیشن یونیک 106-Aکیمپس کے حافظ احمد نے حا صل کی۔ اس موقع پر وائس چیئرمین یونیک گروپ عفیف اشرف صدیقی، ڈائریکٹر یونیک گروپ پروفیسر وسیم انور چوہدری اور ڈائریکٹر یونیک گروپ محمد عبداللہ سمیت اساتذہ اور طلبا کی کثیر تعداد نے شرکت کی۔