وفاقی سول حساس ادارے اور پولیس کی کارروائی، طلبہ کو منشیات فروخت کرنے والا اہم ملزم گرفتار

گرفتار ملزم سولجر بازار، گارڈن، بہادر آباد اورشہر کے گردونواح میں اسکولوں کے طلبہ کو چرس فروخت کرنے میں ملوث تھا

اتوار 10 مئی 2026 20:45

وفاقی سول حساس ادارے اور پولیس کی کارروائی، طلبہ کو منشیات فروخت کرنے ..

کراچی(اُردو پوائنٹ اخبارتازہ ترین - این این آئی۔ 10 مئی2026ء) وفاقی سول حساس ادارے اورفیروزآباد پولیس نے مشترکہ کارروائی کرتے ہوئے اسکولوں کے طلبہ کومنشیات فروخت کرنے والے اہم ملزم کوگرفتارکرکے اس کے قبضے سے منشیات برآمد کرلی۔تفصیلات کے مطابق وفاقی سول حساس ادارے اورفیروز آباد پولیس نے مشترکہ انٹیلیجنس بیسڈ آپریشن کرتے ہوئے منشیات فروش ملزم کوگرفتار کرلیا۔

ملزم کی شناخت محمد فیضان ولد محمد ندیم کے نام سیکی گئی، ایس ایس پی ایسٹ زبیر نذیر شیخ کے مطابق گرفتار ملزم سولجر بازار، گارڈن، بہادر آباد اورشہر کے گردونواح میں اسکولوں کے طلبہ کو چرس فروخت کرنے میں ملوث تھا۔گرفتارملزم ماضی میں پولیس کے ہاتھوں گرفتاری کے بعد ملزم نے اپنے ذاتی موبائل فون نمبر بند کر دیے تھے اورمنشیات فروشی کے لیے دیگر نمبر استعمال کر رہا تھا۔

(جاری ہے)

گرفتار ملزم نے انکشاف کیا کہ گرفتاری سے قبل وہ وحید رمضانی سے منشیات حاصل کرتا رہا، بعد ازاں اس کے ایک دوست ابراہیم (الیکٹریشن)نے اسکا رابطہ ناصرنامی منشیات فروش سے کروایا جس سے وہ منشیات خرید رہا تھا۔گرفتارملزم کشہرکے علاقے معصوم شاہ (مسجد)، تھارو لائن اور گارڈن کے قریب تعلیمی اداروں کے طلبہ کو منشیات فروخت کررہا تھا گرفتار ملزم انتہائی شاطر و چلاک ہے جس کی گرفتاری کے لیے پہلے بھی متعدد چھاپہ مارکارروائیاں کی گئی ہیں۔کارروائی کے دوران ملزم کے قبضے سے 1250 گرام اعلی کوالٹی کی چرس اور 25 گرام ویڈ بھی برآمد کی گئی گرفتارملزم کیخلاف فیروزآباد تھانے میں درج کرکے تفتیش انویسٹیگیشن ونگ کے سپرد کردی گئی۔