Live Updates

یورپی یونین کے وزرائے خارجہ کا خلیجی ممالک کے ساتھ تعلقات مضبوط بنانے پر زور

منگل 12 مئی 2026 12:21

برسلز (اُردو پوائنٹ اخبارتازہ ترین - اے پی پی۔ 12 مئی2026ء) یورپی یونین کے وزرائے خارجہ نےبرسلز میں ہونے والے اپنے ماہانہ اجلاس کے دوران خلیجی تعاون کونسل (جی سی سی) کے رکن ممالک کے ساتھ تعلقات مضبوط بنانے کی اہمیت پر زور دیا۔اماراتی نیوز ایجنسی وام کے مطابق یورپی یونین کی خارجہ پالیسی اور سلامتی امور کی اعلیٰ نمائندہ کاجا کالاس نے اجلاس کے بعد بریفنگ دیتے ہوئے بتایا کہ وزرا نے یورپی یونین اور جی سی سی کے درمیان سٹریٹجک شراکت داری پر تبادلہ خیال کیا۔

کاجا کالاس نے کہا کہ آبنائے ہرمز کی صورتحال مزید خراب ہو رہی ہے، جس کے باعث کئی تجارتی راستے شدید متاثر ہوئے ہیں۔ انہوں نے بتایا کہ ایران نے ان اداروں کی فہرست میں بھی توسیع کی ہے جنہیں وہ جہاز رانی کی آزادی کے لیے خطرہ سمجھتا ہے۔

(جاری ہے)

وزرائے خارجہ نے یورپی بحری آپریشن ’’سپائیڈیز‘‘ پر بھی گفتگو کی، جو بحری آمد و رفت کی آزادی کو یقینی بنانے میں کردار ادا کر رہا ہے۔

کالاس نے تصدیق کی کہ یورپی یونین ایران کے ساتھ معاملات میں اپنے کئی دہائیوں کے تجربے کی بنیاد پر اس فریم ورک کے تحت تعاون کو مزید مضبوط بنانے کا ارادہ رکھتی ہے۔غزہ کی صورتحال کے حوالے سے کاجا کالاس نے کہا کہ حالات بدستور انتہائی سنگین ہیں۔ انہوں نے انتہا پسند آبادکاروں کی جانب سے بڑھتے ہوئے تشدد پر بھی تشویش ظاہر کی۔شام کے حوالے سے کاجا کالاس نے بتایا کہ وزرا نے دمشق کے ساتھ تعاون کے معاہدے کو دوبارہ فعال کرنے پر اتفاق کیا ہے، جسے مذاکرات کی بحالی کے لیے ایک مثبت اشارہ سمجھا جا رہا ہے۔

انہوں نے کہا کہ شام کے ساتھ اعلیٰ سطحی سیاسی مذاکرات بھی کیے جائیں گے۔انہوں نے اس بات کی بھی تصدیق کی کہ یورپی یونین شام میں عبوری مرحلے اور تعمیر نو کے عمل کی حمایت کرتی ہے اور فوری اقدامات کے لیے تیار ہے، تاہم وہ حقیقی اور جامع سیاسی منتقلی سمیت ٹھوس پیش رفت کی منتظر ہے۔