دبئی بزنس فورم چین کا آئندہ ایڈیشن 14 اکتوبر کو شین ژین میں ہو گا،دبئی چیمبرز

دبئی (اُردو پوائنٹ اخبارتازہ ترین - اے پی پی۔ 12 مئی2026ء) دبئی چیمبرز نے اعلان کیا ہے کہ دبئی بزنس فورم چین کا آئندہ ایڈیشن 14 اکتوبر 2026 کو شین ژین میں ’’بڑے پیمانے پر پیش رفت: مشترکہ کامیابی کو تیز کرنا‘‘ کے عنوان کے تحت منعقد ہوگا۔ اماراتی نیوز ایجنسی وام کے مطابق فورم میں دبئی اور چین کے کاروباری رہنما شریک ہوں گے تاکہ اسٹریٹجک شراکت داری کو فروغ دیا جا سکے، سرمایہ کاری کے مواقع کو وسعت دی جا سکے اور تجارت، جدت اور ٹیکنالوجی پر مبنی ترقی کے نئے راستے کھولے جا سکیں۔

یہ فورم دبئی اور چین کے درمیان بڑھتے ہوئے اقتصادی تعلقات کو مزید مضبوط بنانے کے لیے عملی تجارتی، سرمایہ کاری اور سرحد پار تعاون کے مواقع فراہم کرے گا۔ اس کے ساتھ ساتھ یہ چینی کمپنیوں کے لیے دبئی کے اس کردار کو بھی اجاگر کرے گا جو علاقائی اور عالمی منڈیوں میں توسیع کے لیے ایک اہم عالمی کاروباری مرکز کی حیثیت رکھتا ہے۔

(جاری ہے)

دبئی چیمبرز کے صدر اور چیف ایگزیکٹو آفیسر محمد علی راشد لوٹاہ نے کہا کہ دبئی اور چین کے درمیان تجارت، سرمایہ کاری، جدت اور پائیدار ترقی پر مبنی مضبوط اقتصادی تعلقات موجود ہیں،انہوں نے کہا کہ شین ژین میں فورم کا انعقاد دونوں منڈیوں کی کاروباری برادری کے درمیان تعاون کے نئے راستے پیدا کرنے کی اہمیت کو ظاہر کرتا ہے۔

انہوں نے کہا کہ فورم ڈیجیٹل معیشت، ابھرتی ہوئی ٹیکنالوجیز، لاجسٹکس اور جدید مینوفیکچرنگ جیسے شعبوں میں اہم مواقع تلاش کرنے کے لیے ایک سٹریٹجک پلیٹ فارم فراہم کرے گا۔فورم میں سرکاری و نجی شعبے کے اعلیٰ حکام، عالمی کمپنیاں، ٹیکنالوجی کمپنیوں کے نمائندے ، سرمایہ کار اور وینچر کیپیٹل ادارے شریک ہوں گے۔ شرکا کو خیالات کے تبادلے، تعاون کے نئے امکانات تلاش کرنے اور مختلف شعبوں میں کاروباری ترقی کے عملی مواقع کی نشاندہی کا موقع ملے گا۔

فورم کے ایجنڈے میں خصوصی مباحثے اور نیٹ ورکنگ سیشن شامل ہوں گے تاکہ کمپنیاں اسٹریٹجک مواقع کو عملی نتائج میں تبدیل کر سکیں۔شین ژین کو اس ایڈیشن کی میزبانی کے لیے اس کی ٹیکنالوجی، جدت اور جدید مینوفیکچرنگ کے عالمی مرکز کی حیثیت کے باعث منتخب کیا گیا ہے۔ یہ شہر گریٹر بے ایریا کے مرکز میں واقع ہے، جو تکنیکی جدت کا ایک عالمی مرکز سمجھا جاتا ہے۔

فورم دبئی چیمبرز کی ان مسلسل کوششوں کا حصہ ہے جن کا مقصد بین الاقوامی اقتصادی شراکت داری کو فروغ دینا، غیر ملکی سرمایہ کاری کو راغب کرنا اور دبئی کو کاروبار، تجارت اور جدت کے عالمی مرکز کے طور پر مزید مستحکم کرنا ہے۔یہ دبئی بزنس فورم کا پانچواں بین الاقوامی ایڈیشن اور چین میں منعقد ہونے والا دوسرا ایڈیشن ہوگا۔ اگست 2024 میں بیجنگ میں منعقد ہونے والے گزشتہ ایڈیشن میں 800 سے زائد کاروباری رہنماؤں نے شرکت کی تھی۔