گلشن ظہور سیکٹر ون کے مکین پانی کی بندش کے خلاف پھٹ پڑے، شدید نعرے بازی

کراچی(اُردو پوائنٹ اخبارتازہ ترین - این این آئی۔ 14 مئی2026ء) لائنز ایریا میں پانی کے بدترین بحران کے خلاف شہریوں کا غصہ پھٹ پڑا، گلشن ظہور سیکٹر ون میں خواتین، بزرگوں اور بچوں سمیت بڑی تعداد میں علاقہ مکین گھروں سے باہر نکل آئے اور علی رضا پمپنگ اسٹیشن کے خلاف زبردست احتجاجی مظاہرہ کیا۔ مظاہرین نے ہاتھوں میں خالی بالٹیاں اور برتن اٹھا رکھے تھے جبکہ‘‘پانی دو، زندگی دو’’اور‘‘واٹر مافیا نامنظور’’کے نعرے علاقے میں گونجتے رہے۔

احتجاج میں شریک خواتین کا کہنا تھا کہ گزشتہ تین ہفتوں سے گھروں میں پانی کی ایک بوند تک نہیں آرہی، جس کے باعث روزمرہ زندگی مفلوج ہو چکی ہے۔ شدید گرمی میں بچے، بزرگ اور مریض شدید مشکلات کا شکار ہیں جبکہ خواتین دور دراز علاقوں سے مہنگے داموں پانی خریدنے پر مجبور ہیں۔

(جاری ہے)

مظاہرین نے کہا کہ گلشن ظہور سیکٹر ون مکمل طور پر پانی سے محروم ہے جبکہ ملحقہ سیکٹر 2 بی میں دن رات پانی فراہم کیا جا رہا ہے، جو کھلی ناانصافی ہے۔

شہریوں نے الزام عائد کیا کہ علی رضا پمپنگ اسٹیشن کے انسپیکٹر شفاقت کی مبینہ سرپرستی میں پانی کی غیر منصفانہ تقسیم جاری ہے۔ علاقہ مکینوں کے مطابق غیر قانونی کنکشنز اور مبینہ رشوت کے بغیر پانی کا حصول ناممکن بنا دیا گیا ہے۔ عوام کا کہنا ہے کہ ہزاروں روپے وصول کرنے کے باوجود پانی بند کر دیا جاتا ہے اور دوبارہ بحالی کے لیے مزید رقوم طلب کی جاتی ہیں۔

مظاہرین نے کہا کہ وہ مکمل طور پر ٹینکر اور ٹینکی مافیا کے رحم و کرم پر آ چکے ہیں۔ 800 لیٹر پانی کی ٹینکی 1400 روپے جبکہ 1500 لیٹر پانی 2500 روپے میں فروخت کیا جا رہا ہے، جو غریب عوام کے ساتھ کھلی زیادتی اور لوٹ مار ہے۔ شہریوں کا کہنا تھا کہ واٹر کارپوریشن کی نااہلی اور مبینہ کرپشن نے پانی کو بھی کاروبار بنا دیا ہے۔احتجاج کرنے والوں نے الزام لگایا کہ انسپیکٹر شفاقت اور متعلقہ عملہ عوامی مسائل حل کرنے کے بجائے مبینہ طور پر پانی مافیا کو تحفظ فراہم کر رہا ہے۔

متعدد شکایات اور فون کالز کے باوجود متعلقہ افسران نہ کوئی جواب دیتے ہیں اور نہ ہی پانی کی فراہمی بحال کرنے کے لیے عملی اقدامات کیے جا رہے ہیں۔مظاہرین نے حکومت سندھ، واٹر کارپوریشن اور اینٹی کرپشن اداروں سے مطالبہ کیا کہ علی رضا پمپنگ اسٹیشن میں جاری مبینہ کرپشن، غیر قانونی کنکشنز اور پانی مافیا کے خلاف فوری کارروائی کی جائے، انسپیکٹر شفاقت سمیت ذمہ دار اہلکاروں کا احتساب کیا جائے اور گلشن ظہور سیکٹر ون سمیت متاثرہ علاقوں میں فوری پانی کی فراہمی بحال کی جائے، بصورت دیگر احتجاج کا دائرہ وسیع کرنے کی وارننگ دی گئی۔