استعمال شدہ پلاسٹک کو دوبارہ کارآمد بنانے کے لیے ضوابط کی ضرورت

اسلام آباد (اُردو پوائنٹ ۔ UN اردو۔ 14 مئی 2026ء) اقوام متحدہ کے ادارہ خوراک و زراعت (ایف اے او) نے زور دیا ہے کہ خوراک کی پیکنگ میں استعمال ہونے والے ری سائیکل شدہ پلاسٹک کی حفاظت یقینی بنانے کے لیے دنیا بھر میں یکساں معیارات مقرر کیے جانا چاہئیں۔

ادارے نے خوراک میں پلاسٹک کی آلودگی سے متعلق اپنی نئی رپورٹ میں بتایا ہے کہ دنیا بھر کے ممالک کچرے کے عالمی بحران سے نمٹنے کے لیے پلاسٹک کی تیزی سے ری سائیکلنگ کر رہے ہیں۔

'ایف اے او' سے وابستہ ماہر وٹوریو فٹوری نے کہا ہے کہ پلاسٹک کا کچرا دنیا بھر میں بڑھتا ہوا مسئلہ ہے۔

(جاری ہے)

اگرچہ اس سے نمٹنے کے لیے بہتر ری سائیکلنگ ضروری ہے مگر اس عمل سے صحت عامہ کے لیے نئے خطرات پیدا نہیں ہونے چاہییں۔

پلاسٹک کی محفوظ ری سائیکلنگ

خوراک کی پیکنگ اشیا کے معیار کو برقرار رکھنے، ان کی مدت استعمال بڑھانے اور خوراک کے ضیاع کو کم کرنے میں اہم کردار ادا کرتی ہے۔

خوراک کی پیکنگ میں استعمال کے لیے پلاسٹک کو ری سائیکل کرنا پیچیدہ کام ہے کیونکہ ایسے مواد کو سخت کیمیائی حفاظتی معیارات پر پورا اترنا چاہیے۔

تحقیق سے سامنے آیا ہے کہ ری سائیکل شدہ پلاسٹک میں دھاتوں، آگ کو روکنے والے کیمیکل، فتھیلیٹس اور دیرپا آلودہ مادوں کی مقدار نئے پلاسٹک کے مقابلے میں زیادہ ہو سکتی ہے۔

تاہم، ماہرین کا کہنا ہے کہ اگر ری سائیکل شدہ پلاسٹک کو مکمل صفائی، جراثیم کشی اور سخت نگرانی کے مراحل سے گزارا جائے تو وہ نئے پلاسٹک جتنا ہی محفوظ ہو سکتا ہے۔

'ایف اے او' نے خبردار کیا ہے کہ اس معاملے میں دائروی معیشت کے طریقہ کار کو نہایت احتیاط سے نافذ کرنا ہو گا تاکہ ماحولیاتی تحفظ اور خوراک کی سلامتی کے درمیان توازن برقرار رہے۔

متبادل مواد سے لاحق خطرات

رپورٹ میں پیکنگ کے لیے متبادل چیزوں، جیسا کہ بائیو پلاسٹک، نباتاتی فائبر اور پروٹین پر مبنی مواد کا بھی جائزہ لیا گیا ہے۔ عام طور پر انہیں ماحول دوست قرار دیا جاتا ہے لیکن بائیو بیسڈ ہونے کا مطلب ہرگز یہ نہیں کہ وہ قدرتی طور پر آسانی سے تحلیل ہو سکتے۔ ایسے بعض مواد عام پلاسٹک جیسے ہی ہوتے ہیں جبکہ کچھ ایسے ہیں جنہیں ختم ہونے کے لیے مخصوص ماحول درکار ہوتا ہے۔

ایسے متبادل مواد سے بھی کئی طرح کے خطرات وابستہ ہیں۔ نباتاتی مواد میں زرعی ادویات کے باقیات، قدرتی زہریلے مادے، پھپھوندی سے پیدا ہونے والے زہر یا بھاری دھاتیں موجود ہو سکتی ہیں جبکہ پروٹین پر مبنی پیکنگ خوراک میں گلوٹین جیسے الرجی پیدا کرنے والے اجزا منتقل کر سکتی ہے۔ متبادل مواد میں بھی کیمیائی اضافے بھی شامل ہوتے ہیں اور ان کے طویل المدتی اثرات کے بارے میں خاطر خواہ معلومات موجود نہیں ہیں۔

مائیکرو اور نینو پلاسٹک کا مسئلہ

مائیکرو پلاسٹک اور نینو پلاسٹک بھی بڑا مسئلہ بن چکے ہیں۔ پلاسٹک کے نہایت باریک ذرات انسانی خون، پھیپھڑوں، ماں کے دودھ اور یہاں تک کہ نومولود بچوں کی نوال میں بھی پائے گئے ہیں۔ تاہم انضباطی اداروں کے پاس اب تک ان ذرات کی پیمائش کے معیاری طریقے موجود نہیں جس کے باعث صحت پر ان کے اثرات کا درست اندازہ لگانا مشکل ہے۔

ری سائیکلنگ کے بعض طریقے بالخصوص مکینیکل ری سائیکلنگ پلاسٹک کو مزید چھوٹے ذرات میں توڑ کر مائیکرو پلاسٹک پیدا کر سکتے ہیں۔

'ایف اے او' نے زور دیا ہے کہ ری سائیکلنگ کے نظام کو موثر نگرانی کے تحت چلایا جانا ضروری ہے جس میں مکمل صفائی اور آلودہ مواد کو ہٹانے کے اقدامات شامل ہوں۔

یہ نتائج عالمی غذائی معیارات مرتب کرنے والے ادارے 'کوڈیکس ایلیمنٹیرئس کمیشن' کے آئندہ اجلاسوں میں زیر بحث آئیں گے۔ اس وقت مختلف ممالک ری سائیکل شدہ پلاسٹک اور خوراک سے متعلق مواد کے لیے مختلف قوانین سے کام لے رہے ہیں جس کے باعث تجارت اور صارفین کے تحفظ سے متعلق مسائل پیدا ہوتے ہیں۔