غزہ: ملبے کے ڈھیر سے سمندر میں جزیرے بنانے کا منصوبہ

اسلام آباد (اُردو پوائنٹ ۔ UN اردو۔ 14 مئی 2026ء) غزہ میں جنگ کی تباہ کاریوں سے پیدا ہونے والے ملبے کو ری سائیکل کرکے ساحلی زمین کو بڑھانے اور سمندر میں مصنوعی جزائر کی تعمیر کے امکانات کا جائزہ جاری ہے۔ اقوام متحدہ کے ماحولیاتی پروگرام (یونیپ) نے بتایا ہے کہ 31 ماہ جاری رہنے والی جنگ کے نتیجے میں علاقہ 5 کروڑ 70 لاکھ ٹن ملبے سے بھر گیا ہے۔

جنگ میں غزہ کی تقریباً تین چوتھائی عمارتیں تباہ ہو گئی ہیں۔

اس منصوبے کا ایک فائدہ یہ ہے کہ اس سے ملبے کی بہت بڑی مقدار کو استعمال میں لایا جا سکے گا جبکہ تعمیرات کے لیے نئی مٹی اور پتھر نکالنے یا سمندر کی تہہ کھودنے کی زیادہ ضرورت نہیں ہو گی۔

(جاری ہے)

اقوام متحدہ کا انتباہ

اقوام متحدہ کے ماحولیاتی پروگرام(یونیپ) نے خبردار کیا ہے کہ انجینئرنگ کے اس قدر بڑے منصوبے کے لیے دستیاب ملبہ ناکافی ہے۔ اس کے لیے تقریباً 20 کروڑ مکعب میٹر تعمیراتی مواد درکار ہو گا جس میں سے صرف ایک کروڑ مکعب میٹر مواد ہی ری سائیکل شدہ ملبے سے حاصل کیا جا سکتا ہے۔

یونیپ کے مطابق، اگر غزہ کے مجموعی ملبے کا نصف سے زیادہ حصہ (تقریباً 2 کروڑ مکعب میٹر یا 55 فیصد) بھی ری سائیکل کر لیا جائے تب بھی اس سے مجوزہ پیمانے پر ساحلی بحالی کے لیے درکار مجموعی مواد کا صرف 10 فیصد ہی فراہم ہو سکے گا۔

اس حوالے سے ادارے کی رپورٹ میں زور دیا گیا ہے کہ ایسے منصوبوں کا جائزہ ان کی عملی افادیت، لاگت اور تعمیرنو کی ترجیحات کو مدنظر رکھ کر لیا جانا چاہیے۔ اگر ملبہ تکنیکی اعتبار سے محفوظ اور موزوں ہو تو اسے مصنوعی جزائر بنانے، نشیبی علاقوں کو بھرنے اور زمین کی سطح بلند کرنے کے لیے استعمال کیا جا سکتا ہے۔

ملبے کا تعمیراتی استعمال

زیر جائزہ منصوبوں کے مطابق، کنکریٹ کے بڑے بلاک سمندر کی تہہ میں بنیادوں کے طور پر استعمال کیے جا سکتے ہیں جبکہ ری سائیکل شدہ ملبہ بندرگاہ کے لیے دیواروں اور ساحلی حفاظتی رکاوٹوں کو مضبوط بنانے میں مدد دے سکتا ہے۔

سب سے اہم سوال خود ملبے کی نوعیت سے متعلق ہے۔ غزہ کے ملبے میں تباہ شدہ عمارتوں کا کنکریٹ، ٹائلیں اور لوہا تو دوبارہ استعمال ہو سکتے ہیں مگر ایسبیسٹاس سے آلودہ مواد، گھریلو سامان اور ملبے تلے دبی انسانی باقیات جیسی چیزیں ناقابل استعمال ہوں گی۔

ان پیچیدگیوں کے پیش نظر ادارے کا کہنا ہے کہ تمام ناقابل استعمال اور خطرناک مواد کو مکمل طور پر الگ کرنا ضروری ہو گا اور تبھی اسے کسی تعمیراتی منصوبے میں استعمال کیا جا سکتا ہے۔

ری سائیکلنگ مراکز کا قیام

اقوام متحدہ کی ٹیمیں غزہ میں دو ری سائیکلنگ مراکز قائم کر رہی ہیں تاکہ ملبے کو دوبارہ تعمیراتی مواد میں تبدیل کیا جا سکے۔

اَن پھٹا گولہ بارود بھی ایک بڑا خطرہ ہے جو کہ زمین کو آلودہ کر سکتا ہے۔ ری سائیکلنگ کے لیے پیش رفت کا انحصار بھاری مشینری کی فراہمی پر ہے جس کے غزہ میں داخلے پر اسرائیل نے پابندیاں عائد کر رکھی ہیں۔

ملبے کو ٹھکانے لگانے کا معاملہ ثقافتی ورثے اور سلامتی کے اعتبار سے بھی حساس ہے کیونکہ اس میں جنگ کے دوران تباہ ہونے والی تاریخی عمارتوں اور آثار قدیمہ کا ملبہ بھی شامل ہے۔

لبنان اور جاپان کی مثال

تمام مشکلات کے باوجود دنیا میں چند ایسی مثالیں موجود ہیں جن سے اندازہ ہوتا ہے کہ غزہ کی تعمیرنو میں ملبے کو کس حد تک استعمال کیا جا سکتا ہے۔

لبنان میں خانہ جنگی کے بعد دارالحکومت بیروت میں سمندر سے زمین واپس حاصل کرنے کے لیے ملبہ کام میں لایا گیا تھا۔ تاہمیونیپ کا کہنا ہے کہ اس تجربے کے دوران ماحولیاتی اور انتظامی مسائل بھی سامنے آئے تھے۔

جاپان میں 2011 کے زلزلے اور سونامی کے بعد ملبے کو احتیاط سے الگ کرکے اسے ساحلی تحفظ، زمین کی سطح بلند کرنے اور تعمیر نو کے کاموں میں استعمال کیا گیا۔

یونیپ کے مطابق، سمندری ماحول میں ملبے کو استعمال کرنے کے لیے فلسطینی ماحولیاتی قانون (7) 1999 کی پابندی ضروری ہے جس کے تحت ایسے تمام منصوبوں کے لیے ماحولیاتی اثرات کا جائزہ لینا لازم ہے۔ رپورٹ میں یہ سفارش بھی کی گئی ہے کہ اس معاملے میں بحیرہ روم سے متعلق بین الاقوامی اور علاقائی ماحولیاتی اصولوں اور معاہدوں کو بھی مدنظر رکھا جائے۔