افغانستان غذائی قلت: یو این ادارہ زندگی سے رشتہ جوڑے رکھنے میں مصروف

اسلام آباد (اُردو پوائنٹ ۔ UN اردو۔ 14 مئی 2026ء) رقیبہ احمدی بھوک کو روزمرہ کی حقیقت کے طور پر جانتی ہیں۔ چھ بچوں کی ماں ہونے کے ناطے انہیں کئی مرتبہ ایسے انتہائی مشکل فیصلے کرنا پڑتے ہیں کہ گھر میں پہلے کس کو کھانا دیا جائے، کس کو انتظار کرنا ہو گا اور موجود خوراک کتنے دن استعمال ہو سکتی ہے۔

وہ افغانستان کے شمال مشرقی شہر فیض آباد میں رہتی ہیں جہاں ایک کے بعد دوسرا بحران جنم لیتا ہے اور لوگ روزانہ بقا کی جنگ لڑ رہے ہیں۔

وہ کہتی ہیں 'ہم جو کھانا خرید سکتے ہیں، وہ اپنے بچوں کو دے دیتے ہیں، لیکن وہ بھی کافی نہیں ہوتا'

ان کی سب سے چھوٹی بیٹی غذائی قلت کے باعث پیدا ہونے والے جسمانی عوارض سے صحت یاب ہو رہی ہے جبکہ ان کے شوہر بے روزگار ہیں۔

(جاری ہے)

بحران در بحران

رقیبہ اور بے شمار دیگر افغان خاندانوں کے لیے زندگی غیر یقینی ہوتی جا رہی ہے جبکہ ملک ایک ساتھ کئی بحرانوں سے نبرد آزما ہے جن میں تباہ ہوتی معیشت، بے روزگاری اور شدید موسمی تبدیلیاں شامل ہیں۔

مشرق وسطیٰ کے بحران کے اثرات اور پاکستان کے ساتھ بڑھتی ہوئی کشیدگی کے باعث سرحدیں بند ہونے سے رسد کا نظام متاثر ہوا ہے، اشیائے خورونوش کی قیمتیں مزید بڑھ گئی ہیں اور غذائی عدم تحفظ میں اضافہ ہوا ہے۔

افغانستان میں ادارے کے ڈائریکٹر جان ایلیف کا کہنا ہے کہ غذائی معاونت جیسے پروگرام اختیاری نہیں بلکہ ضروری ہیں۔ یہ افغانستان بھر میں لاکھوں خواتین اور بچوں کے لیے زندگی کی ضمانت ہیں۔

شدید بھوک اور غذائی قلت

تازہ بحرانوں سے پہلے ہی افغانستان شدید بھوک اور غذائی قلت کا سامنا کر رہا تھا۔ اس وقت ایک کروڑ 38 لاکھ سے زیادہ لوگ شدید غذائی عدم تحفظ کا شکار ہیں جبکہ 50 لاکھ بچے اور حاملہ یا دودھ پلانے والی خواتین غذائی قلت کا سامنا کر رہی ہیں۔

گزشتہ سال 'ڈبلیو ایف پی' نے ایک کروڑ 24 لاکھ سے زیادہ افغانوں کو خوراک اور غذائی معاونت فراہم کی۔

معاشی مواقع کا خاتمہ

افغانستان میں معاشی مواقع بھی تیزی سے کم ہوتے جا رہے ہیں اور خواتین کی زندگیوں پر پابندیاں مزید سخت ہو رہی ہیں۔

ان کے گھر کے قریب سبزیوں کا چھوٹا سا کھیت اور چند مرغیاں اور ایک بکری کسی حد تک ان کے گھرانے کو سہارا دیتے ہیں لیکن یہ بنیادی ضروریات پوری کرنے کے لیے کافی نہیں۔

ان حالات میں وہ اپنے تمام بچوں کو دو وقت کھانا نہیں دے سکتیں۔

رقیبہ کی امید

پندرہ ماہ کی ندا ان 37 لاکھ افغان بچوں میں شامل ہیں جنہیں شدید غذائی قلت کا سامنا ہے۔ طبی معائنے کے دوران نرس ان کا وزن اور قد دیکھتی ہیں۔ گزشتہ معائنے کے مقابلے میں اب ان کی صحت بہتر ہو گئی ہے لیکن کم غذائیت کی علامات اب بھی موجود ہیں۔ اس معاملے میں مکمل صحت یابی فوری نہیں ہوتی بلکہ یہ ایک طویل سفر ہے جس میں ابھی کئی مراحل باقی ہیں۔

معائنے کے بعد رقیبہ کو خصوصی غذائیت سے بھرپور مونگ پھلی کا تین کلو گرام پیسٹ دیا جاتا ہے۔ یہ غذائی سپلیمنٹ ندا کا وزن اور طاقت بڑھانے میں مدد دیتا ہے۔ علاوہ ازیں، خاندان کو گندم کا آٹا، دالیں، تیل اور نمک بھی فراہم کیا جاتا ہے۔

رقیبہ چاہتی ہیں کہ ان کے بچے بھوک اور بیماری کا شکار ہوئے بغیر پروان چڑھیں۔ مگر اس خاندان کے مستقبل پر غیر یقینی کے سائے منڈلا رہے ہیں۔

تاہم فی الوقت وہ پرامید ہیں کہ 'ڈبلیو ایف پی' کی یہ امداد جاری رہے گی۔ یہ مدد خواتین کے لیے بہت اہم ہے اور اسے جاری رہنا چاہیے۔

یہ فیچر پہلے انگلش میں یہاں شائع ہوا تھا۔