غزہ: اسرائیل کا پولیس کو نشانہ بنانا جنگی جرم، انسانی حقوق دفتر

یو این جمعرات 14 مئی 2026 23:00

اسلام آباد (اُردو پوائنٹ ۔ UN اردو۔ 14 مئی 2026ء) اقوام متحدہ کے دفتر برائے انسانی حقوق (او ایچ سی ایچ آر) نے تصدیق کی ہے کہ غزہ میں اسرائیلی فوج پولیس اہلکاروں کو نشانہ بنا رہی ہے جو عسکری اہداف میں امتیاز کے اصول کی خلاف ورزی ہے اور جنگی جرم ہے۔

دفتر کی جانب سے جاری کردہ بیان میں کہا گیا ہے کہ گزشتہ ماہ غزہ میں گنجان آبادیوں پر اسرائیلی حملوں میں چھ پولیس اہلکار مارے گئے۔

ان حملوں میں تین اور نو سال کی عمر کے دو بچوں کی ہلاکت بھی ہوئی۔

رواں سال کے آغاز سے اب تک اسرائیلی حملوں کے ایسے چھ واقعات ریکارڈ کیے گئے ہیں جن میں 26 پولیس اہلکار ہلاک ہوئے جس کی تصدیق غزہ کی موجودہ وزارت داخلہ نے بھی کی ہے۔

پولیس فوج نہیں

بیان میں کہا گیا ہے کہ پولیس اہلکاروں کا شمار شہریوں میں ہوتا ہے اور انہیں براہ راست جنگی کارروائیوں میں حصہ لینے کے بجائے محض امن و امان برقرار رکھنے کی ذمہ داری نبھانے پر حملوں کا نشانہ نہیں بنایا جا سکتا۔

(جاری ہے)

ایسی کارروائیاں عسکری اہداف میں امتیاز کے اصول کی پامالی اور شہریوں پر دانستہ حملوں کے مترادف ہیں۔

اپریل میں مقبوضہ مغربی کنارے میں اسرائیلی افواج اور آبادکاروں کے حملوں میں 122 شہری ہلاک ہوئے۔ یہ حملے فلسطینیوں کے گھروں، بے گھر افراد کی پناہ گاہوں، عبادت گاہوں، سڑکوں، گاڑیوں، امدادی مراکز اور سکولوں پر کیے گئے۔

دفتر نے بتایا ہے کہ ان حملوں میں کم از کم 22 بچوں، آٹھ خواتین اور متعدد صحافیوں کی ہلاکت بھی ہوئی۔