گورنر خیبرپختونخوا سے پشاور میں اینجلز ہوم ویلفیئر آرگنائزیشن کا دورہ

جمعہ 15 مئی 2026 15:26

پشاور (اُردو پوائنٹ اخبارتازہ ترین - اے پی پی۔ 15 مئی2026ء) گورنر خیبرپختونخوا فیصل کریم کنڈی نے جمعہ کے روز پشاور میں اینجلز ہوم ویلفیئر آرگنائزیشن کا دورہ کیا۔گورنر ہاوس پشاور تر جمان کے مطابق دورے میں انہیں ادارے کے مختلف شعبوں کے حوالے سے بریفنگ دی گئی۔ گورنر نے خصوصی افراد، بزرگوں، مردوں اور خواتین سے ملاقات بھی کی۔اس موقع پر گفتگو کرتے ہوئے گورنر خیبرپختونخوا نے کہا کہ بوڑھوں، مردوں اور خواتین کی دیکھ بھال انسانیت کی خدمت کی بہترین مثال ہے۔

انہوں نے کہا کہ خیبرپختونخوا میں 17 لاکھ خصوصی افراد موجود ہیں، تاہم ان کے لیے سہولیات ناکافی ہیں۔فیصل کریم کنڈی نے کہا کہ وفاقی اور صوبائی حکومتوں کو ایسے اداروں کی معاونت کرنی چاہیے اور وہ خود بھی اپنا کردار ادا کریں گے۔

(جاری ہے)

انہوں نے کہا کہ انسانیت کی خدمت سیاست سے بالاتر ہو کر کی جانی چاہیے۔گورنر خیبرپختونخوا نے معذور افراد کے کوٹے کو 2 فیصد سے بڑھا کر 5 فیصد کرنے کی ضرورت پر بھی زور دیا۔

اس موقع پر رکن قومی اسمبلی رمیش کمار بھی ان کے ہمراہ موجود تھے۔میڈیا سے گفتگو کرتے ہوئے فیصل کریم کنڈی نے کہا کہ سی این جی اسٹیشنز کی بندش کے معاملے پر وفاق سے بات کی گئی ہے۔ان کا کہنا تھا کہ ہائی کورٹ نے سی این جی اسٹیشنز بند نہ کرنے کا حکم دیا ہے، تاہم صوبائی حکومت اس فیصلے پر عمل درآمد نہیں کر پا رہی۔گورنر خیبرپختونخوا نے کہا کہ صوبے میں گندم کا مسئلہ بھی سنگین ہے اور گندم کی ترسیل روک دی جاتی ہے۔فیصل کریم کنڈی کا کہنا تھا کہ گندم اور گیس کے معاملات پر وفاق خیبرپختونخوا کے ساتھ بیٹھ کر اپنا کردار ادا کرے۔