کراچی، عید کے تینوں روز قے، اسہال، پیٹ درد کے مریضوں کا سرکاری ہسپتالوں میں رش

زیادہ گوشت، کم پانی، غیر متوازن خوراک سے قے، اسہال اور بدہضمی کی شکایات بڑھ گئیں،طبی ماہرین

ہفتہ 30 مئی 2026 13:30

کراچی (اُردو پوائنٹ اخبارتازہ ترین - این این آئی۔ 30 مئی2026ء) کراچی میں عید کے تینوں روز قے، اسہال اور پیٹ درد کے مریضوں کا سرکاری ہسپتالوں میں رش رہا۔سول ہسپتال کی ایمرجنسی کے انچارج ڈاکٹر عمران نے بتایا کہ عید کے دوسرے روز 100 سے زائد مریض الٹی اور پیٹ درد کی شکایات کے ساتھ سول ہسپتال پہنچے۔ڈاکٹر عمران نے کہا کہ عید کے تیسرے روز معدے کے امراض میں مبتلا 100 سے زائد مریض آئے۔

(جاری ہے)

جناح ہسپتال کی ایمرجنسی کے انچارج عرفان صدیقی نے کہا کہ جناح ہسپتال میں بھی عید کے پہلے روز پیٹ کے امراض کا شکار 50 سے زائد مریض آئے، زیادہ گوشت، کم پانی، غیر متوازن خوراک سے قے، اسہال اور بدہضمی کی شکایات بڑھ گئیں۔اس حوالے سے طبی ماہرین نے کہا کہ گوشت کے ساتھ سبزیوں اور پانی کا کم استعمال نظامِ ہضم پر بوجھ ڈال سکتا ہے، گوشت کے ساتھ سلاد، سبزیاں اور پانی کا زیادہ استعمال معدے کے مسائل سے بچا سکتا ہے۔طبی ماہرین کے مطابق بیک وقت زیادہ مقدار میں گوشت کھانے سے گریز کیا جائے۔