بلاول بھٹو کو نشانہ بنانا جمہوری سیاست کو کمزور کرنے کی کوشش ہے، ناز بلوچ کا کیپٹن صفدر کو کرارا جواب

ؔ سیاسی مخالفین الزام تراشی کے بجائے کارکردگی اور وڑن کا مقابلہ کریں، رہنما پیپلز پارٹی ناز بلوچ کا بیان

جمعہ 5 جون 2026 21:20

Qاسلام آباد(اُردو پوائنٹ اخبارتازہ ترین - آن لائن۔ 05 جون2026ء) پاکستان پیپلز پارٹی کی رہنما اور رکن قومی اسمبلی ناز بلوچ نے کیپٹن صفدر کے بیان پر ردعمل دیتے ہوئے کہا ہے کہ چیئرمین بلاول بھٹو زرداری کو نشانہ بنانا دراصل جمہوری سیاست کو کمزور کرنے کی کوشش ہے۔اپنے بیان میں ناز بلوچ نے کہا کہ چیئرمین بلاول بھٹو زرداری نے ہمیشہ مسائل کی سیاست کی ہے، الزامات اور ذاتی حملوں کی نہیں۔

انہوں نے کہا کہ پاکستان پیپلز پارٹی کا واضح مؤقف ہے کہ سیاسی میدان میں مقابلہ کارکردگی، عوامی خدمت اور وڑن کی بنیاد پر ہونا چاہیے، نہ کہ کردار کشی اور الزام تراشی پر۔انہوں نے کہا کہ گلگت بلتستان میں جس قسم کا بیانیہ چلایا جا رہا ہے وہ درحقیقت نوجوان قیادت اور اس کی بڑھتی ہوئی مقبولیت سے خوف کی علامت ہے۔

(جاری ہے)

ان کا کہنا تھا کہ چیئرمین بلاول بھٹو زرداری نے پارلیمان کے اندر اور باہر ہمیشہ غریب اور محروم طبقات کی آواز کو مؤثر انداز میں اجاگر کیا ہے۔

ناز بلوچ نے کہا کہ اگر سیاسی مخالفین کے پاس کوئی متبادل پروگرام، پالیسی یا عوامی فلاح کا منصوبہ موجود ہے تو اسے عوام کے سامنے پیش کریں، کیونکہ الزامات اور منفی پروپیگنڈے سے سیاسی حقائق تبدیل نہیں ہوتے۔انہوں نے مزید کہا کہ چیئرمین بلاول بھٹو زرداری نے بین الاقوامی سطح پر پاکستان کا مؤقف جس وقار، اعتماد اور مؤثر انداز میں پیش کیا، وہ پوری قوم کے سامنے ہے۔ ناز بلوچ کا کہنا تھا کہ گلگت بلتستان کے عوام باشعور اور سمجھدار ہیں، وہ بخوبی جانتے ہیں کہ کون عوامی خدمت کر رہا ہے اور کون سیاست کو ذاتی عناد اور منفی مہم کا ذریعہ بنا رہا ہی