لاہورچیمبرمیں نیوٹیک روڈ شو ، صنعتوں کی ضروریات کے مطابق ہنر مند افرادی قوت کی تیاری پر زور

لاہور(اُردو پوائنٹ اخبارتازہ ترین - این این آئی۔ 03 جولائی2026ء) لاہور چیمبر آف کامرس اینڈ انڈسٹری کے زیر اہتمام نیشنل ووکیشنل اینڈ ٹیکنیکل ٹریننگ کمیشن (نیوٹیک) کے اشتراک سے انڈسٹری بزنس لیڈ ٹریننگ اینڈ جاب پلیسمنٹ پروگرام'' کے حوالے سے ایک روڈ شو منعقد کیا گیا جس کا مقصد صنعتوں کی ضروریات کے مطابق ہنر مند افرادی قوت کی تیاری، صنعت و تعلیمی اداروں کے درمیان روابط کو مضبوط بنانا اور نوجوانوں کے لیے روزگار کے بہتر مواقع پیدا کرنا تھا۔

اجلاس کی صدارت لاہور چیمبر کے صدر فہیم الرحمٰن سہگل نے کی۔ اس موقع پر نیوٹیک ریجنل آفس پنجاب کی ڈائریکٹر جنرل آصفہ مقبول اور نیوٹیک اسلام آباد کے کنسلٹنٹ مدثر اقبال نے شرکت کی۔ مدثر اقبال نے پروگرام کے اغراض و مقاصد، طریقہ کار اور صنعتوں کے لیے دستیاب مواقع پر تفصیلی پریزنٹیشن بھی دی۔

(جاری ہے)

اجلاس میں لاہور چیمبر کی ایگزیکٹو کمیٹی کے اراکین افتخار احمد، عامر علی، آمنہ رندھاوا اور محسن بشیر بھی موجود تھے۔

اس موقع پر خطاب کرتے ہوئے لاہور چیمبر کے صدر فہیم الرحمٰن سہگل نے کہا کہ پاکستان کا سب سے بڑا سرمایہ اس کی نوجوان آبادی ہے، مگر بدقسمتی سے اس کا ایک بڑا حصہ ہنر سے محروم ہے۔ انہوں نے کہا کہ نوجوانوں کو جدید اور مارکیٹ کی ضروریات کے مطابق فنی و تکنیکی تربیت فراہم کرنا وقت کی اہم ضرورت ہے، جس سے نہ صرف روزگار کے مواقع بڑھیں گے بلکہ صنعتی پیداوار میں اضافہ اور ہنر مند افرادی قوت کی بیرون ملک فراہمی کے ذریعے زرمبادلہ میں بھی خاطر خواہ اضافہ ہوگا۔

انہوں نے کہا کہ پاکستان سیاحت، زراعت اور قدرتی وسائل سے مالا مال ہے، تاہم ملک کی سب سے بڑی طاقت اس کے نوجوان ہیں جو آبادی کا تقریباً 65 فیصد ہیں۔ اگر اس نوجوان آبادی کو ہنر مند نہ بنایا گیا تو ملک اپنی معاشی صلاحیتوں سے بھرپور فائدہ نہیں اٹھا سکے گا۔فہیم الرحمٰن سہگل نے کہا کہ ہنر مندی کی ترقی میں سرمایہ کاری کو قومی ترجیح بنایا جانا چاہیے۔

انہوں نے کہا کہ نوجوانوں کو مالی امداد پر انحصار کرنے کے بجائے فنی تربیت دے کر بااختیار بنایا جائے تاکہ وہ ملکی معیشت میں فعال کردار ادا کر سکیں۔انہوں نے نیوٹیک کو یقین دلایا کہ لاہور چیمبر صنعتوں اور تربیتی اداروں کے درمیان مضبوط رابطہ قائم کرنے اور صنعتوں کی افرادی قوت کی ضروریات کے مطابق تربیتی پروگراموں کو فروغ دینے میں ہر ممکن تعاون فراہم کرے گا۔

ڈائریکٹر جنرل نیوٹیک ریجنل آفس پنجاب آصفہ مقبول نے کہا کہ نیوٹیک ہمیشہ سے نجی شعبے کے ساتھ مل کر کام کرنے کا خواہاں رہا ہے کیونکہ صنعتیں اپنی ضروریات اور مطلوبہ مہارتوں سے بہتر طور پر آگاہ ہوتی ہیں۔ انہوں نے کہا کہ انڈسٹری بزنس لیڈ ٹریننگ اینڈ جاب پلیسمنٹ پروگرام کا مقصد یہی ہے کہ حکومتی وسائل سے فراہم کی جانے والی تربیت صنعتوں کی حقیقی ضروریات کے مطابق ہو اور تربیت مکمل کرنے والے نوجوانوں کو روزگار کے مواقع بھی میسر آئیں۔

انہوں نے کہا کہ اس مقصد کے حصول کے لیے لاہور چیمبر کا تعاون انتہائی اہم ہے تاکہ یہ یقینی بنایا جا سکے کہ تربیت کا فائدہ حقیقی معنوں میں بے روزگار اور غیر ہنر مند نوجوانوں تک پہنچے اور وہ باعزت روزگار حاصل کر سکیں۔انہوں نے امید ظاہر کی کہ لاہور چیمبر کے تعاون سے صنعتیں اپنی حقیقی مہارتی ضروریات کی نشاندہی کریں گی، مستحق نوجوانوں کے انتخاب میں معاونت کریں گی اور تربیت مکمل ہونے کے بعد انہیں روزگار فراہم کرنے میں بھی کردار ادا کریں گی۔

اس سے قبل نیوٹیک کے کنسلٹنٹ مدثر اقبال نے پروگرام پر تفصیلی بریفنگ دیتے ہوئے بتایا کہ اس منصوبے کے تحت صنعتیں نصاب کی تیاری، تربیت یافتہ افراد کے انتخاب اور ملازمت کی فراہمی کے عمل میں فعال کردار ادا کر سکیں گی، جس سے ملک میں صنعتی ضروریات سے ہم آہنگ ہنر مند افرادی قوت تیار ہوگی۔