وسیم عباس اور صبا ء حمید کے راستے ہمیشہ کے لیے جدا، طلاق کی تصدیق

صبا حمید کے ساتھ دوسری شادی 29سال تک برقرار رہی‘ وسیم عباس

بدھ 8 جولائی 2026 20:00

لاہور(اُردو پوائنٹ اخبارتازہ ترین - این این آئی۔ 08 جولائی2026ء) پاکستان شوبز انڈسٹری کے سینئر اداکار وسیم عباس نے اداکارہ صبا ء حمید سے اپنی طلاق کی تصدیق کرتے ہوئے انکشاف کیا ہے کہ دونوں کئی برس پہلے ہی الگ ہو چکے تھے، جبکہ قانونی طور پر ان کی شادی 29سال بعد ختم ہوئی۔وسیم عباس نے ایک انٹرویو میں بتایا کہ صبا ء حمید کے ساتھ ان کی یہ دوسری شادی 29 سال تک چلی۔

انہوں نے انکشاف کیا کہ وہ دونوں پچھلے 14سال سے ایک دوسرے سے الگ رہ رہے تھے۔الگ ہونے کے باوجود انہوں نے ایک ساتھ کام بھی کیا، اگر آگے بھی انہیں کسی ڈرامے میں ساتھ کام کرنے کا موقع ملا تو وہ ضرور کریں گے اور ان کے دل میں ایک دوسرے کے لیے کوئی برائی یا رنجش نہیں ۔طلاق کے بعد کے احساسات پر بات کرتے ہوئے وسیم عباس نے کہا کہ مجھے اس طلاق سے بالکل بھی دکھ نہیں ہوا کیونکہ ہمارے درمیان اب وہ جذبات ہی نہیں بچے تھے۔

(جاری ہے)

انہوں نے بتایا کہ ان دونوں کی آپس میں کوئی اولاد بھی نہیں ہے۔دوسری شادی کے فیصلے پر بات کرتے ہوئے انہوں نے یہ بھی کہا کہ میں اپنی اس دوسری شادی کو کوئی بہت بڑی غلطی تو نہیں کہتا، کیونکہ مجھے اس وقت یہ فیصلہ بہت اچھا لگتا تھا مگر اگر آج میں پیچھے مڑ کر دیکھوں تو شاید یہ ایک غلطی ہی تھی اور مجھے اس رشتے کے ختم ہونے کا رتی بھر بھی افسوس نہیں ۔تیسری شادی کے بارے میں بات کرتے ہوئے انہوں نے کہا کہ ان کا ایسا کوئی منصوبہ نہیں ہے،بچے ہیں، دادا بن چکا ہوں جبکہ پہلی بیوی بھی اسی گھر میں رہتی ہیں اس لیے ان کی نظر میں اب شادی کرنا مناسب نہیں ۔