موت کا سفر ڈنکی؛ چار سالوں میں یورپ جانے کے خواہشمند 335 پاکستانی جاں بحق

اسلام آباد (اُردو پوائنٹ اخبارتازہ ترین۔ 12 جولائی 2026ء) غیر قانونی طریقے سے سرحدیں عبور کرکے یورپ جانے کی خواہش نے سینکڑوں پاکستانیوں کے ہنستے کھیلتے گھر اجاڑ دیئے، کیوں کہ گزشتہ چار سالوں کے دوران غیر قانونی ہجرت یا 'ڈنکی' کے خطرناک ترین راستوں پر قسمت آزمائی کرنے والے کم از کم 335 پاکستانی سمندر برد ہو کر اپنی جانوں سے ہاتھ دھو بیٹھے، جون 2023ء سے لے کر اب تک کشتیوں کے 7 بڑے بھیانک حادثات رپورٹ ہو چکے ہیں۔

وفاقی تحقیقاتی ادارے ایف آئی اے کی جانب سے جاری کردہ ایک انتہائی دلخراش رپورٹ کے مطابق غیر قانونی ہجرت کی تاریخ کا سب سے مہلک اور لرزہ خیز حادثہ جون 2023ء میں یونان کے ساحل کے قریب پیش آیا، اس بدقسمت بحری جہاز میں 226 پاکستانی سوار تھے جو یورپ کا خواب آنکھوں میں سجائے سفر کر رہے تھے، اس حادثے میں 207 پاکستانی سمندر کی لہروں کا شکار ہو کر جاں بحق ہوئے اور صرف 19 افراد کی جان ہی معجزانہ طور پر بچائی جا سکی۔

(جاری ہے)

بتایا گیا ہے کہ موت کے یہ سائے اگلی سال بھی منڈلاتے رہے، دسمبر 2024ء میں یونان جانے والی ایک اور کشتی حادثے کا شکار ہوئی، اس کشتی پر 69 پاکستانی سوار تھے، جن میں سے 25 نوجوان سمندر میں ڈوب کر جاں بحق ہوئے، خوش قسمتی سے 44 افراد کو ریسکیو کر لیا گیا، یر قانونی طریقے سے یورپ کے ساحلوں تک پہنچنے کا یہ جان لیوا بحران سال 2025ء میں بھی پوری شدت سے جاری رہا اور اس بار شمالی افریقہ کے روٹس سب سے زیادہ خطرناک ثابت ہوئے۔

معلوم ہوا ہے کہ جنوری 2025ء میں مراکش کے قریب ایک بحری حادثے میں 70 پاکستانی شہری شدید متاثر ہوئے جنہیں تارکینِ وطن کے لیے ایک بڑا دھچکا قرار دیا گیا، اس سے اگلے ہی ماہ فروری 2025ء لیبیا کے ساحل پر ایک اور کشتی الٹ گئی جس میں سوار 40 پاکستانیوں کی شناخت ہوئی، ان میں سے 23 افراد سمندر کی بے رحم لہروں کی نذر ہو گئے جبکہ صرف 13 افراد زندہ بچ پائے۔

بتایا جارہا ہے کہ حالیہ سال 2026ء تک صورتحال مسلسل انتہائی ابتر اور تشویشناک بنی رہی، سرکاری دستاویزات بتاتی ہیں کہ 2025ء اور 2026ء کے درمیانی عرصے میں لیبیا سے یورپ جانے کی کوشش کے دوران کشتیاں ڈوبنے کے مزید 3 بڑے اور خوفناک سانحات پیش آئے، یہ حادثات بالترتیب اپریل 2025ء، اکتوبر 2025ء اور حال ہی میں اپریل 2026ء میں پیش آئے، ان تینوں حادثات نے مجموعی طور پر 62 پاکستانیوں کو بری طرح متاثر کیا، جس کے نتیجے میں 48 معصوم جانیں ضائع ہوئیں اور صرف 30 افراد ہی زندہ لوٹ سکے۔