9 اگست سے 5 ستمبر تک ویتنام میں مس ورلڈ کے 75ویں سالانہ ایڈیشن مقابلے ہوں گے

جمعرات 23 جولائی 2026 16:51

لاہور (اُردو پوائنٹ اخبارتازہ ترین - این این آئی۔ 23 جولائی2026ء) 9اگست سے 5 ستمبر تک ویتنام میں مس ورلڈ کے 75ویں سالانہ ایڈیشن کے مقابلے ہوں گے۔انیقہ معراج تاریخ میں پہلی پاکستانی خاتون ہوں گی جو عالمی سطح پر مس ورلڈ مقابلے میں ملک کی نمائندگی کریں گی۔گزشتہ دنوں تاج پوشی کی تقریب لاہور کے فلیٹیز ہوٹل میں منعقد ہوئی، جہاں انہیں 2022 کی مس پاکستان یونیورسل ڈاکٹر شفق اختر اور مسٹر پاکستان ورلڈ عطااللہ گجرنے تاج پہنایا۔

مس ورلڈ کی سوشل میڈیا پر کیے گئے اعلان کے مطابق انیقہ معراج 9 اگست سے 5 ستمبر تک ویتنام میں ہونے والے مس ورلڈ کے 75ویں سالانہ ایڈیشن میں پاکستان کی نمائندگی کریں گی۔24 سالہ انیقہ معراج بزنس اور اکنامکس میں گریجویٹ ہیں اور اس وقت آڈٹنگ اور اکائونٹنگ میں ماسٹرز کر رہی ہیں۔

(جاری ہے)

انہوں نے اپنے پیغام میں کہا کہ ان کا مقصد اسٹیٹ آتھرائزڈ پبلک اکائونٹنٹ بننا ہے اور بچوں کے حقوق اور لڑکیوں کی تعلیم کے لیے آواز بلند کرنا ہے تاکہ پاکستان کا مستقبل روشن ہو۔

انیقہ اس سے قبل بھی کئی عالمی مقابلہ حسن میں پاکستان کی نمائندگی کر چکی ہیں، جن میں مس ارتھ، مس گلوبل، مس کازمو، مس ایکو انٹرنیشنل اور مس آورا انٹرنیشنل شامل ہیں۔ انہوں نے کوسووو میں منعقدہ فریڈم آف دی ورلڈ مقابلے میں 4 اعزازات بھی اپنے نام کیے۔اگرچہ یہ مس ورلڈ میں پاکستان کی پہلی شرکت ہے، تاہم ملک اس سے قبل بھی عالمی مقابلہ حسن میں حصہ لیتا رہا ہے۔ حالیہ برسوں میں مس یونیورس مقابلے میں ایریکا رابن اور روما ریاض نے پاکستان کی نمائندگی کر کے خوب پذیرائی حاصل کی۔