اسپاٹیفائی کا عاطف اسلم کو خراجِ تحسین

کراچی(اُردو پوائنٹ اخبارتازہ ترین - این این آئی۔ 23 جولائی2026ء) عالمی میوزک اسٹریمنگ پلیٹ فارم اسپاٹیفائی نے پاکستان کے نامور گلوکار عاطف اسلم کی عالمی مقبولیت اور دو دہائیوں پر محیط شاندار فنی سفر کو خراجِ تحسین پیش کرتے ہوئے ان کے نئے البم "صبح آئے نا" کی ریلیز کے موقع پر خصوصی مہم کا آغاز کر دیا ہے۔ اسپاٹیفائی کے مطابق مداح 31 جولائی کو البم کی ریلیز سے قبل ہی کاؤنٹ ڈاؤن پیج کے ذریعے اس تک پیشگی رسائی محفوظ کر سکتے ہیں۔

اسپاٹیفائی کی جانب سے جاری کردہ اعداد و شمار کے مطابق عاطف اسلم کے گیت دنیا بھر میں تقریباً 8 ارب مرتبہ سنے جا چکے ہیں، جبکہ ان کے ماہانہ سامعین کی تعداد 3 کروڑ سے تجاوز کر چکی ہے۔ ان کی موسیقی دنیا کے 184 ممالک میں سنی جا رہی ہے، جو ان کی بین الاقوامی مقبولیت کا واضح ثبوت ہے۔

(جاری ہے)

اعداد و شمار کے مطابق گزشتہ ایک سال کے دوران عاطف اسلم کی 96 فیصد اسٹریمنگ پاکستان سے باہر ہوئی، جس سے جنوبی ایشیا، مشرق وسطیٰ، شمالی امریکا، یورپ اور ایشیا پیسیفک سمیت دنیا بھر میں ان کی مقبولیت نمایاں ہوتی ہے۔

اس کے علاوہ ان کے گیت دنیا بھر میں صارفین کی تیار کردہ 3 کروڑ 75 لاکھ سے زائد پلے لسٹس کا حصہ بن چکے ہیں۔اسپاٹیفائی کے مطابق عاطف اسلم کی موسیقی نوجوان نسل، خصوصاً جین زی میں بھی غیر معمولی مقبول ہے، جہاں ان کی 85 فیصد اسٹریمنگ اسی طبقے کی جانب سے کی جاتی ہے۔ گزشتہ ایک برس کے دوران 4 کروڑ 10 لاکھ سے زائد نئے یا دوبارہ متحرک سامعین نے ان کی موسیقی سنی، جو ان کے فن کی مسلسل مقبولیت کی عکاسی کرتا ہے۔

اسپاٹیفائی پاکستان اور متحدہ عرب امارات کی آرٹسٹ اینڈ لیبل پارٹنرشپس منیجر رطابہ یعقوب نے کہا کہ عاطف اسلم ان نایاب فنکاروں میں شامل ہیں جو اپنے ملک کی اجتماعی یادداشت کا حصہ بن چکے ہیں۔ ان کے بقول عاطف اسلم کی موسیقی نے مختلف نسلوں اور خطوں کے لوگوں کو ایک جذباتی رشتے میں جوڑ رکھا ہے اور اسپاٹیفائی پر ان کی مقبولیت مسلسل بڑھ رہی ہے۔

عاطف اسلم نے اپنے نئے البم کے حوالے سے کہا کہ "صبح آئے نا" ان کی زندگی کے اندرونی احساسات اور اپنی حقیقی ذات کی تلاش کے سفر کی عکاسی کرتا ہے۔ انہوں نے کہا کہ وہ اپنے مداحوں کے سامنے یہ البم پیش کرنے کے لیے بے حد پرجوش ہیں۔اسپاٹیفائی کے مطابق نئی البم "صبح آئے نا" میں "صبح آئے نا"، "سفر میں ہوں"، "عشق"، "لیٹس ہیو سم فن"، "سن سجنا"، "ہوں عشق میں"، "چار یار" اور "سچے وعدی" سمیت آٹھ گیت شامل ہیں، جو 31 جولائی کو باضابطہ طور پر ریلیز کیے جائیں گے۔ کمپنی نے مداحوں کو البم کی پیشگی رسائی محفوظ کرنے کی سہولت بھی فراہم کر دی ہے۔