مستونگ میں قومی شاہراہ کے قریب ججوں کی گاڑی پر اندھا دھند فائرنگ

سیشن جج سکیورٹی گارڈ سمیت جاں بحق، جوڈیشل مجسٹریٹ سمیت 2 افراد شدید زخمی

ساجد علی جمعرات 23 جولائی 2026 12:47

مستونگ میں قومی شاہراہ کے قریب ججوں کی گاڑی پر اندھا دھند فائرنگ

مستونگ (اُردو پوائنٹ اخبارتازہ ترین۔ 23 جولائی 2026ء) بلوچستان کے ضلع مستونگ میں قومی شاہراہ کے قریب مسلح افراد کی جانب سے ججوں کی گاڑی پر فائرنگ کے نتیجے میں سیشن جج مستونگ عبدالحکیم کاکڑ اور ان کا سکیورٹی گارڈ جاں بحق ہو گئے، جبکہ جوڈیشل مجسٹریٹ طارق لاشاری سمیت دو افراد شدید زخمی ہوئے ہیں۔ پولیس ذرائع کے مطابق فائرنگ کا یہ المناک واقعہ مستونگ میں قومی شاہراہ پر واقع ولی خان پاٹک کے قریب پیش آیا، حملے کے وقت جج صاحبان کوئٹہ سے روانہ ہو کر سیشن کورٹ مستونگ آ رہے تھے کہ راستے میں ان کی گاڑی کو نشانہ بنایا گیا۔

بتایا گیا ہے کہ ملزمان نے گاڑی کو ہدف بنا کر شدید فائرنگ کی اور موقع سے فرار ہونے میں کامیاب ہو گئے، حملے کے نتیجے میں گاڑی میں موجود جج صاحبان اور عملہ شدید متاثر ہوا، فائرنگ کے نتیجے میں سیشن جج مستونگ عبدالحکیم کاکڑ اور ان کا سیکیورٹی گارڈ موقع پر ہی زخموں کی تاب نہ لاتے ہوئے جاں بحق ہوگئے۔

(جاری ہے)

معلوم ہوا ہے کہ واقعے میں جوڈیشل مجسٹریٹ طارق لاشاری سمیت 2 افراد شدید زخمی ہوئے، جنہیں فوری طور پر طبی امداد کے لیے ہسپتال منتقل کر دیا گیا جب کہ واقعے کی اطلاع ملتے ہی پولیس اور سیکیورٹی فورسز کی بھاری نفری نے موقع پر پہنچ کر علاقے کو گھیرے میں لے لیا اور شواہد اکٹھے کرتے ہوئے ملزمان کی تلاش شروع کردی۔