×حکومت کی اولین ترجیح کاروبار میں آسانیاں پیدا کرنا اور سرمایہ کاری کے لیے سازگار ماحول فراہم کرنا ہے، ہارون اختر خان

جمعہ 24 جولائی 2026 18:00

Iاسلام آباد(اُردو پوائنٹ اخبارتازہ ترین - آن لائن۔ 24 جولائی2026ء) وزیراعظم کے معاونِ خصوصی برائے صنعت و پیداوار ہارون اختر خان سے اسلام آباد چیمبر آف کامرس اینڈ انڈسٹری کے صدر نے وفد کے ہمراہ ملاقات کی۔ملاقات میں وزارتِ صنعت و پیداوار کے جوائنٹ سیکریٹری اور ایکسپورٹ پروسیسنگ زونز اتھارٹی کے چیئرمین فریدون اکرم شیخ بھی موجود تھے۔اسلام آباد چیمبر آف کامرس اینڈ انڈسٹری کے وفد نے وزیراعظم محمد شہباز شریف اور ہارون اختر خان کی معاشی ترقی اور عوامی فلاح کے لیے کاوشوں کو سراہا۔

ہارون اخترخان نے کہا کہ وزیراعظم محمد شہباز شریف کا وژن پاکستان کی معاشی ترقی کی نئی راہیں ہموار کر رہا ہے، وزیراعظم محمد شہباز شریف ہمیشہ کاروباری برادری اور سرمایہ کاروں کو زیادہ سے زیادہ سہولت فراہم کرنے کی ہدایت دیتے ہیں، حکومت کی اولین ترجیح کاروبار میں آسانیاں پیدا کرنا اور سرمایہ کاری کے لیے سازگار ماحول فراہم کرنا ہے۔

(جاری ہے)

ہارون اختر خان نے کہا کہ قومی صنعتی پالیسی مقامی صنعتوں کی ترقی اور صنعتی پیداوار میں اضافے کے لیے تشکیل دی گئی ہے، ضابطہ جاتی اصلاحات کے جامع پروگرام پر عملدرآمد جاری ہے تاکہ غیر ضروری سرکاری رکاوٹوں کا خاتمہ کیا جا سکے،ہم سرمایہ کاروں اور صنعتکاروں کے لیے آسان، شفاف اور کاروبار دوست نظام قائم کر رہے ہیں۔اسلام آباد چیمبر آف کامرس اینڈ انڈسٹری کے وفد نے ترکی کے آئندہ تجارتی وفد کے دورے سے متعلق معاونِ خصوصی کو آگاہ کیا۔ہارون اخترخان نے کہا کہ ترکی کے تجارتی وفد کا دورہ پاکستان کی برآمدات اور تجارتی تعلقات کے فروغ میں اہم کردار ادا کرے گا۔